A Concellaría de Cultura organiza a proxección do documental “EN TODAS AS MANS”, incluído nun proxecto de revalorización do monte veciñal en mancomún que foi desenvolvido pola cooperativa redondelá Trespés.
“En todas as mans” é unha peza audiovisual que pretende mostrar a actividade das comunidades de montes e a vida dos seus protagonistas, acompañadas de voces expertas da economía, xudicatura, ecoloxismo, historia ou o activismo social. A súa suma ofrécenos un conxunto diverso de usos, reflexións, problemáticas e propostas arredor da xestión comunitaria do monte en Galicia e Portugal.
O proxecto “En todas as mans” non pretendeu ser unicamente un documental, senón que tivo un longo proceso de produción no que a cooperativa Trespés procurou construír unha comunidade de persoas e entidades amigas. De feito realizou múltiples presentacións en asociacións, xornadas, congresos, comunidades de montes e centros sociais no territorio galego-portugués, co obxectivo de abrir o debate público e provocar o interese da poboación en xeral.
O proxecto financiouse con pequenas achegas de máis de 250 persoas, arredor de vinte entidades e 19 montes veciñais, e a súa realización transcendeu o puramente cinematográfico e abrangueu tamén o eido social e o político. Ademais contou coa colaboración da AGADIC, a TVG, a Deputación de Lugo e o Concello de Pontevedra.
Na presentación en Redondela, que se celebrará o xoves 7 de maio, ás 20.30 h, no auditorio da Xunqueira, contarase coa presenza da directora do filme, Sociedade Cooperativa Galega, a encargada de xestionar e desenvolver todo o proxecto.
A entrada é de balde.
