O Concello de Ponteareas presentou o programa das Festas de Setembro que inclúe máis de 50 propostas culturais e deportivas que completarán unha oferta para todos os públicos durante os 30 días do mes.
A alcaldesa de Ponteareas, Nava Castro, acompañada do concelleiro de Cultura, Ricardo González, presentou o cartel das festas de setembro, A Nosa Señora dos Remedios e San Miguel.
O programa, que aínda ten citas por pechar, abrangue actos para todas as idades, nenos, adultos e familias, e de índole diversa para todos os gustos polo que se celebrarán eventos culturais, deportivos, lúdicos e musicais do 1 de setembro ao 1 de outubro.
O Concello confirma que na Festa dos Remedios o pregoeiro será Xose Antonio Touriñán, o cómico galego coñecido como “Touri”.
Algúns dos exemplos máis destacados son o concerto Gala Lírica de Zarzuela “Soutullo na Ialma”, a XV Feira Tradicional dos Remedios, o LV Concurso Rexional de Gaitas do País, que rende homenaxe a Antonio Cabaleiro, ou a actuación Camiñantes e Cantantes presentada por Manuel Manquiña e Pepo Suevos.
TODA A PROGRAMACIÓN NESTE ENLACE: Programa festas setembro 2023
A oferta deportiva comezará o venres, día 1 de setembro, co XIV Torneo de Tenis, ao que seguirán xornadas de bádminton, carreira pedestre, ciclismo, xadrez, fútbol, petanca e hóckey.
Ademais das habituais noites de verbena, haberá visitas guiadas polo casco vello de Ponteareas, o cemiterio ou o castro de Troña así como obradoiros infantís de cociña, artesanía ou xogos tradicionais.
Unha ampla oferta de actividades co obxectivo de ofrecer aos veciños e veciñas unha forma de reunión, diversión e entretemento.
En total, máis de 50 actividades repartidas ao longo dun mes, nas que o ocio e desfrute serán os grandes protagonistas.
