A Concellaría de Cultura de Redondela inaugura este domingo un ciclo de teatro para a poboación infantil.
TEATRO CATIVO é o nome deste ciclo que inclúe tres producións escénicas orientadas ás idades máis temperás, e que se vai desenvolver nas tardes de domingo de febreiro e marzo.
Con estas propostas preténdese achegar espectáculos de calidade, en lingua galega, ao sector da poboación que menos oferta ten de actividades artísticas, e inclúe dúas producións para bebés e menores de 4 anos.
Da man de tres compañías galegas, Os tres TENedORES, O Baúl da tía tola e Teatro da Semente, esta xeira presenta espectáculos para público infantil e familiar, orientado a maiores de 4 anos o primeiro, e a bebés e nenas e nenos até 4 anos para os dous seguintes.
A programación é a seguinte:
- domingo 22 de febreiro, ás 18.00 h. OS TRES TENedORES: “Cocido sinfónico”.
- domingo 1 de marzo, ás 17.00, 18.00 e 19.00 h. O BAÚL DA TÍA TOLA: “Tilintilonia”.
- domingo 8 de marzo, ás 18.00 h. TEATRO DA SEMENTE: “Chíos”.
A función deste primeiro domingo, COCIDO SINFÓNICO, está orientada a público infantil e familiar, preferiblemente para maiores de 4 anos.
Este innovador espectáculo está protagonizado por tres músicos e cómicos (Saúl Cacharrón, Martín Nogueira e Paco Nogueiras) que interpretan música en directo e clown dende un restaurante no que ofrecen aos comensais as músicas máis saborosas, acompañadas dos pratos máis suculentos e novidosos.
O prezo da entrada é de 2 € para público infantil e 4 € para público adulto, e pódense mercar dende 2 días antes a cada función no multiúsos da Xunqueira, e dúas horas antes o mesmo día do espectáculo.
