Os socios do proxecto europeo Ecotours, financiado con 1, 3 millóns de euros e no que a Universidade de Vigo é única representante española, levan meses traballando no deseño de estratexias que permitan revitalizar zonas costeiras rurais de distintas áreas de Europa, entre elas Galicia, e convertelas en destinos turísticos circulares, ecolóxicos e sostibles.
Esta semana 24 destas investigadoras e investigadores, provenientes de Italia, Hungría, Grecia, Chipre e Francia, realizaron unha visita de estudo a Vigo na que exerceu como anfitrión o grupo de investigación de Organización do Coñecemento, adscrito ao centro de investigación Ecobas.
Durante tres días -de mércores a venres-, combinaron as xuntanzas de traballo no edificio Redeiras con visitas a diferentes enclaves das Rías Baixas, “o que lles permitiu explorar a beleza natural e cultural da nosa rexión”, explica a profesora da Facultade de Comercio Pilar Muñoz Dueñas, coordinadora do proxecto na Universidade de Vigo, ao que engade que “houbo tamén a oportunidade de interactuar con empresas/start-ups de mobilidade sostible e discutir estratexias e solucións para un turismo máis ecolóxico”.
Entre outras temáticas, presentouse o denominado modelo Canvas, ideado para deseñar itinerarios locais, e abordouse o uso de enerxías limpas, transporte verde e prácticas ecolóxicas no turismo circular. “Para nós o fundamental é que os participantes queden coa idea de que o traballo en rede no ecosistema turístico é fundamental”, explica a coordinadora local do proxecto, ao engade que lle gustaría que todas as actividades que se están a levar a cabo redunden “nun aumento da convicción de que a sustentabilidade non só é unha necesidade, senón que pode converterse nun itinerario estratéxico para a súa actividade”.
Apoio individual adaptado ás empresas participantes
Ademais de Galicia, Ecotours tratará de pór sobre a mesa novas alternativas que melloren o valor empresarial da rexión de Sicilia, en Italia; Macedonia occidental, en Grecia; Córcega, en Francia; Nicosia, en Chipre, e o Condado de Csongrád-Csanád, en Hungría. Neste primeiro ano de andadura do proxecto xa se levaron a cabo visitas de estudo a Agrigento, Sicilia, o pasado mes de novembro, e a Nicosia, en Chipre, en xaneiro.
“O obxectivo destas visitas de estudo é promover a aprendizaxe entre iguais e o intercambio de boas prácticas entre países do sector turístico”, explica Muñoz, ao tempo que recalca que estas visitas facilitan o achegamento e a cooperación entre as PEMES turísticas e os axentes interesados. Recóllese información útil sobre as necesidades e peculiaridades dos participantes, “información que se empregará posteriormente para ofrecer apoio individual adaptado ás empresas participantes”, conclúe Múñoz.
