Organizado pola Deputación de Pontevedra e a Fundación Centro de Estudos Eurorrexionales (FCEER) os días 22 e 23 de xuño vaise celebrar no Parador de Turismo de Tui o Foro de Mobilidade Transfronteiriza do Río MIño.
O Foro está financiado nun 75 % con fondos FEDER a través do proxecto “Smart Minho Plus” e aprobado na sexta convocatoria do Programa operativo de cooperación transfronteiriza España-Portugal 2014-2020
O xoves 22
Despois da Apertura Institucional o Foro arrancará coa primeira mesa e co tema:
FERROCARRIL EURORREXIONAL NO CONTEXTO EUROPEO
O ferrocarril do Miño é unha peza estratéxica na vertebración da fachada atlántica da península ibérica, xa que ocupa unha posición central entre as áreas metropolitanas do Porto e de Vigo. Por outra banda, correspóndese co principal paso da fronteira entre Galicia e o norte de Portugal, así como o máis transitado dos pasos fronteirizos entreos dous estados peninsulares.
Esta primeira mesa busca contextualizar o ferrocarril do Miño dentro das dinámicas institucionais e as políticas actuais. Para iso contarase coa presenza do Comisionado do Corredor Atlántico, creado recentemente polo Goberno de España, ao que pertence o ferrocarril miñoto. A presenza do Comisionado do Corredor Mediterráneo, con moitos anos xa de experiencia, será fundamental para aprender da traxectoria e ter referencias doutro territorio semellante ao noso.
Participan:
- Josep Vicent Boira Maiques, comisionado do Goberno para o desenvolvemento do Corredor Mediterráneo en España en ADIF, Ministerio de Fomento
- José Antonio Sebastián Ruiz, comisionado do Goberno para o desenvolvemento do Corredor Atlántico en ADIF, Ministerio de Fomento
É POSIBLE UN TREN DE PROXIMIDADE TRANSFRONTEIRIZO? EXPERIENCIAS EN EUROPA
Un panel de experiencias europeas sobre a implantación de proximidades ferroviarias transfronteirizas, presentadas por técnicas e técnicos e xestoras e xestores destas, nos que se contrastan modelos de implantación e xestión.
Participan:
- Xavier Garcia, Dirección de Cooperación Euromediterránea. Servicio de Cooperación Europea. Liña ferroviaria Niza-Ventimiglia-Cúneo-Turín.
- Matteo Berzi, investigador do Centro Común de Investigación. Comisión Europea. EU Science Hub. Ispra (Italia). Os servizos ferroviarios transfronteirizos entre España e Francia.
Venres 23
AS PROXIMIDADES FERROVIARIAS NO TERRITORIO DO RÍO MIÑO
O obxectivo desta mesa é propoñer e reivindicar uns novos servizos de mobilidade ferroviaria transfronteiriza entre Vigo e Viana do Castelo, arredor do río Miño. Trátase dun territorio fortemente cohesionado e cunhas intensas dinámicas de mobilidade internas. O ferrocarril transfronteirizo permitiría unha maior oferta de mobilidade pública, sostible e de calidade para a poboación.
Participan:
- Álvaro Costa, profesor da Facultade de Enxeñería da Universidade do Porto e investigador en transporte
- Miguel Pazos Otón, profesor de Xeografía Humana na Universidade de Santiago de Compostela
- António Cruz, consultor, relator no seminario Conectividade e Accesibilidade Territorial Transfronteiriza, organizado por CIM Alto Minho en abril de 2022
- Representante de Renfe ou do Ministerio de Transportes, Mobilidade e Axenda Urbana
- Representante do Operador Ferroviario Portugués ou do Ministerio de Infraestruturas de Portugal
13:00 h PRESENTACIÓN DE CONCLUSIÓNS
Está prevista unha declaración institucional a favor da posta en marcha deste servizo e estudaranse casos de éxito en distintas zonas de Europa
