O taller de creación de máscaras de entroido dará comezo esta semana no edificio Multiusos de Arcade
O Concello de Soutomaior, a través da súa Concellería de Xuventude, acaba de presentar o seu programa de actividades para o Entroido 2015. Coa intención de promover a participación infantil e xuvenil nas festas de entroido, a programación inclúe un taller de máscaras e outro de preparación dunha comparsa para o desfile municipal organizado pola Concellería de Cultura do Concello de Soutomaior. As actividades darán comezo esta semana e estenderanse até o sábado 21 de marzo, día no que terá lugar o desfile municipal de comparsas de entroido.
Para nenos de idades superiores ao oito anos deseñouse o taller de máscaras de entroido de cinco horas de duración. Os asistentes aprenderán a construír as súas propias máscaras con vendas de escaiola e as mellores técnicas para decoralas. O taller, que terá lugar no edificio Multiusos de Arcade, dividirase en dúas xornadas, a primeira o martes 17 de febreiro desde as 11:00 até as 13:30 horas e a segunda o venres día 20, desde as 18:00 até as 19:30 horas. O prazo de inscrición permanecerá aberto até cubrir as 30 prazas dispoñibles para esta actividade.
Co obxectivo de promover a colaboración dos veciños máis pequenos nestas festas celebrarase o taller de preparación dunha comparsa para o desfile municipal. Os participantes crearán a súa propia comparsa veciñal para a cabalgata do próximo 21 de febreiro incluíndo a confección dos seus propios disfraces así como o deseño da coreografía, a música e a caracterización dos seus personaxes. As actividades deste taller realizaranse en dous grupos segundo as idades dos participantes. Un grupo para nenos desde o catro até o once anos e outro para os maiores de doce. O taller divídese en cinco xornadas. Comezará o venres 13 de febreiro desde as 16:30 até as 18:30 horas, o luns 16 e mércores 18 de marzo o horario será de 11:00 a 13:00 horas, o xoves 19 de 16:30 a 18:30 horas e a última xornada será a mañá do día do desfile, o sábado día 21 de febreiro, desde as 11:00 ás 13:00 horas. O prazo de inscrición pecharase cando se ocupen as 30 prazas dispoñibles.
Os interesados en recibir información ou realizar a matrícula nalgunha destas actividades poden facelo online a través da web municipal en www.soutomaior.com/xuventude, chamando ao teléfono 986 700 822 ou nas oficinas da OMIX no edificio Multiusos de Arcade todas as tardes de 15:30 a 20:30 salvo os mércores de 09:00 a 14:00. Con estas ofertas o Concello de Soutomaior pretende ampliar a oferta lúdica das festas de entroido aos máis novos e favorecer a súa integración no desenvolvemento dos eventos da comunidade veciñal.
