Inicio Val Miñor Nigrán O Concello de Nigrán presenta a fase final da excavación do Castro...

O Concello de Nigrán presenta a fase final da excavación do Castro de Chandebrito cunha visita guiada a cargo dos seus arqueólogos

O Concello de Nigrán presenta a fase final da excavación do Castro de Chandebrito cunha visita guiada a cargo dos seus arqueólogosA musealización da área analizada estará rematada antes de fin de mes e permitirá por vez primeira que calquera visitante que se achegue perciba restos de diferentes construcións e murallas

O Concello de Nigrán ofrece este sábado 16, Día Mundial do Patrimonio, unha visita guiada ao Castro de Chandebrito ás 11:30 a cargo de Árbore Arqueoloxía, equipo que está a piques de rematar a escavación e primeira musealización dunha área de 58 metros cadrados nesta cima. Estes traballos de escavación, consolidación e restauración rematarán a final de mes despois de levar a cabo dúas intervencións ao longo de 2018 e 2019, a segunda delas financiada integramente por parte do Concello con 31.556 euros a través do Plan Concellos 2018.  Así, a partires de decembro, calquera visitante que se achegue ata o seu cume poderá apreciar in situ, e por vez primeira, restos de tres antigas murallas e de tres construcións  cuxa función aínda se descoñece, todo elo sinalizado nesta ubicación con impresionantes vistas á ría de Vigo.  A maiores, o plan de divulgación contemplado incluirá unha reconstrución virtual web de toda a contorna e os seus achados.

O equipo de Árbore Arqueoloxía atopou pezas de todo tipo, entre os que destacan miles de fragmentos de cerámica de diferentes periodos históricos

O Castro de Chandebrito foi oficialmente escavado no 2008 nunha pequena intervención que permitiu situalo como habitado entre os séculos VI a.C ao II a.C, sen embargo, a nova investigación amplía a ocupación do VIII a.C ao I d.C. É dicir, ten a súa orixe a finais da Idade de Bronce, nos inicios da cultura castrexa que tres séculos máis tarde se espallaría por toda Galicia dando lugar á maioría dos asentamentos coñecidos. Así o certifican as decenas de pezas atopadas (fusos de fío, lá e liño, pedras de afiar, pezas de metal, unha conta púnica…) e os miles de fragmentos de cerámica de diferentes épocas da Historia e moi ben conservadas, algunhas delas con decoración profusa (apareceron desde ánforas romanas ou fenicias que certifican o comercio dos habitantes de Chandebrito cos pobos mediterráneos a cerámica propiamente castrexa).

“Estamos ante o gran tesouro patrimonial de Nigrán e da comarca. O potencial deste castro é maior do que xa se supoñía; dende o Concello seguiremos promovendo novas fases de escavación porque sabemos que este é o camiño para que sexa un referente etnográfico de toda Galicia”, destaca o alcalde, Juan González, quen incide en que, despois dos incendios, “todos comprendemos que a cultura, o respecto ao medio ambiente e a actividade económica deben ir sempre da man” por iso dende o goberno local se aposta por facer investimentos como a musealización deste espazo único ou a creación do primeiro parque forestal da comarca en terreos queimados das parroquias de Camos e Chandebrito.

Así, o Concello de Nigrán organiza este sábado para todas as persoas que desexen coñecer de preto a recente escavación e os novos achados un roteiro guiado e un obradoiro que rematará ás 13:30 no Bar D’Arriba con música en directo nunha sesión vermú. Os interesados en participar deben presentarse ás 11:30 no Bosque da Memoria, ao carón do Castro.

- Publicidade -

ÚLTIMA REVISTA

+ VISTOS

ETIQUETAS

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies