O Concello de Nigrán elixiu o cartaz de Álvaro Cedeira Pérez, presentado baixo o lema ‘Jazznoaire’, como gañador do concurso de carteis ‘Quin Alborés-Nigranjazz’, dotado cun premio de 700 €. A imaxe sinxela dunha trompeta sobre fondo azul e da que emerxe unha bandada de paxaros representará a XIX edición deste emblemático festival que cada verán ten lugar na Foz do Miñor, este ano o 18 e 19 de xullo.
O certame, totalmente anónimo e que rende homenaxe desde o ano 2010 ao falecido artista nigranés Quin Alborés, gran amante do xénero e quen impulsou o evento desde o seu comezo deseñando os tres primeiros carteis, recaeu precisamente nun veciño de 25 anos que, coma Quin, ama as artes gráficas.
“Quería representar visualmente a esencia do jazz como linguaxe libre, emocional e evocadora, a través dunha metáfora sinxela e poética presento a música coma unha forza liberadora que conecta co espírito, coa natureza e co territorio”, explica Álvaro, titulado en fotografía e deseño pola Escola CIFP Audiovisual de Vigo e actualmente traballando como tatuador. “Debuxo desde que nacín, gústame moito, e querería adicarme profesionalmente as artes visuais. Este é o meu primeiro premio e estou moi emocionado de ter gañado”, explica Álvaro, quen nunca antes se presentara nin a este nin a ningún certame.
“Estamos ante un certame no que participan profesionais de toda España e ao que se presentan os carteis de xeito anónimo, baixo un lema, así que foi unha sorpresa que gañase un mozo nigranés porque que recordemos, non gañou ningún veciño a lo menos nos últimos 10 anos, así que a alegría é dobre; Quin Alborés estaría moi orgulloso de este relevo”, consideran Juan González, alcalde de Nigrán, e Felipe Villar, director do festival, ambos membros do Xurado xunto a dúas deseñadoras gráficas da comarca, a reponsable de comunicación do Concello e un irmán de Quin Alborés.
O cartaz bebe do estilismo dos anos 50-60 e, na deliberación final, impúxose a un segundo candidato finalista con estilo oposto. “O Xurado destaca a sinxeleza clásica da composición gañadora e o gran traballo tipográfico desenvolvido en cada apartado, o que confire ao conxunto unha harmonía perfecta entre a propia ilustración e a información sobre o festival, aspecto clave nun cartaz”, considerou o Xurado na súa acta, destacando que a elección “outorga un novo pulo ao certame”.
