A Fundación para a Pesca e o Marisqueo (FUNDAMAR) con sede en Vigo é a primeira, e aínda a única, fundación deste tipo, non só en España senón tamén en Europa, que xunta as organizacións sindicais e empresariais para traballar en sintonía de cara a un fin común.
A xornada desenvolveuse no salón de actos da Cooperativa de Armadores de Pesca del Puerto de Vigo (ARVI), onde ten a sede a Fundación e contou coa presenza da autoridades políticas, sociais e empresariais, entre elas a conselleira do Mar Rosa Quintana, Carmela Silva presidenta da Deputación de Pontevedra, o alcalde de Vigo Abel Caballero, o director xeneral de Ordenación Pesqueira, Carlos Larrañaga; o presidente da Autoridad Portuaria de Vigo, López Veiga; a directora xeral de Desenvolvemento Pesqueiro, Susana Rodríguez Carballo.
FUNDAMAR fai agora cinco anos que naceu, cun marcado carácter laboral e co propósito de crear, impulsar, dirixir ou participar en proxectos ou actuacións dirixidas a mellorar as condicións sociais e de produtividade de empresas, traballadoras e traballadores relacionados ou dependentes da pesca e o marisqueo.
Para isto foi necesaria a confluencia, acordo e mutuo interese dos actuais membros, ARVI, UGT e CCOO. As tres organizacións de común, sen diferenzas nin diverxencias, con sintonía plena, levan traballando un lustro; acometendo, neste tempo, con altos e baixos, moitos proxectos dirixidos á xente traballadora do mar ou abordando aspectos moi ligados en colaboración coas institucións galegas, mais tamén con outros países de Europa, sempre co mar como temática de fondo.
