Un total de 161 nadadores participarán na primeira proba da Triple Corona Illas Atlánticas, que se disputará o vindeiro sábado 8 de setembro entre as Illas Cíes e Baiona cun percorrido de 15 quilómetros.
Do total de participantes, 140 son homes e 21 mulleres con idades comprendidas entre os 17 e os 70 anos, procedentes de 14 Comunidades Autónomas (Galicia, Madrid, Cataluña, Castela-A Mancha, Castela-León, Asturias, País Vasco, Comunidade Valenciana, Estremadura, Andalucía, Illas Canarias, Aragón, Navarra e Murcia), Portugal e Arxentina. O nadador máis novo é o cordobés Álvaro Ruiz Tabares (17 anos) e a de máis idade, o vigués Manuel Antonio Rodríguez (70 anos).
O alcalde e o concelleiro de Asuntos Marítimos de Baiona, Angel Rodal e Raúl Costas; a conselleira do Mar, Rosa Quintana; a secretaria xeral para o Deporte, Marta Míguez; a directora da zona Morrazo-Redondela de Abanca, *Ángela Rodríguez Miguéns; representantes do Monte Real Club de Yates de Baiona, e a directora de organización da proba, Beatriz Alvariño, presentaron esta mañá en rolda de prensa a proba na réplica da carabela Pinta, en Baiona, punto de chegada da travesía.
Todo a punto para disputar, este sábado, a competición de 15 km de distancia, na que destaca a presenza do ourensán Alberto Taboada Vila, terceiro clasificado na primeira edición, e o catalán Sergio Torres
Durante a presentación, a directora da organización, Beatriz Alvariño, destacou a espectacularidade do percorrido pasando polas tres illas do arquipélago das Cíes, As Estelas e a chegada a Baiona, así como a dificultade e a dureza da travesía, principalmente o tramo comprendido entre o quilómetro 5 (pasada a illa sur das Cíes) e o 8 (antes de chegar á península de Monteferro) xa que os nadadores terán que enfrontarse ás correntes, ondada e a dureza do mar aberto.
“Baiona e o Parque Nacional dás Illas Atlánticas foron distinguidos o pasado ano como dous dos 100 mellores destinos turísticos sustentables do planeta pola organización Green Destinations, dous destinos que unen a primeira proba da Tripla Coroa Illas Atlánticas. Desde a organización queremos apostar nesta segunda edición por un turismo sustentable e poñer en valor o patrimonio natural, cultural, paisaxístico e etnográfico do Parque Nacional”, sinalou Alvariño.
Baixo o lema ´Mollámonos polo medio ambiente`, a organización da Triple Corona Illas Atlánticas poñerá en marcha diversas accións ambientais dirixidas a preservar os valores naturais e culturais das illas que integran o Parque, promover a conservación do medio mariño e concienciar e sensibilizar aos nadadores e visitantes das necesidades de protección do medio ambiente.
A directora da organización destacou o apoio da Xunta de Galicia, a través das Consellerías de Medio Ambiente, Deportes e Mar. “Con esta proba queremos promocionar non só o deporte de ultrafondo en augas abertas, senón a riqueza natural das illas que conforman no Parque Nacional dás Illas Atlánticas, o turismo nas Rías Baixas e, en concreto, a vila baionesa, e a nosa gastronomía. En Baiona comeza a primeira proba da segunda edición da Triple Corona Illas Atlánticas, que culminará en 2020 despois de completar o 57 km en tres anos”, apuntou Beatriz Alvariño.
A organización tamén destacou o apoio do Concello de Baiona, especialmente das concellerías de Asuntos Marítimos, Turismo e Cultura, nun ano moi importante para a Real Vila, xa que se conmemora o 525 aniversario da chegada da carabela Pinta a Baiona. “Organizamos unha serie de actividades paralelas para render homenaxe a esta efeméride como unha visita guiada ao centro histórico de Baiona e a carabela Pinta para os participantes e os seus familiares. Ademais, na chegada, os nadadores poderán degustar a torta de Sarmiento, sobremesa típica da vila que brinda homenaxe a Diego Sarmiento, piloto da Pinta”, sinalou Alvariño.
Así mesmo, para coroar a primeira proba da Tripla Coroa, está prevista unha cea coa entrega de premios na pradería do Enxebre Pinta no Parador de Turismo de Baiona, grazas á colaboración da Consellería do Mar, a Organización de Produtores Pesqueiros de Lugo ( OPP07), Armadores de Burela ( ABSA), Mexillón de Galicia, Denominación de Orixe Tenreira galega, Parador de Turismo de Baiona, Torre de Nuñez, Denominación de Orixe Pan de Cea, Pementeira, Torta de Santiago, Adegas Valmiñor, Denominación de Orixe Rías Baixas, Anfaco, Pulponor e a Confraría de Pescadores de Baiona.
Alvariño lembrou que o neopreno é obrigatorio na travesía a nado na que os nadadores terán uns tempos límite de paso nos quilómetros 4 e 8 e un límite para realizar a proba de seis horas e media. Ademais, a organización conta con máis de 100 mantas térmicas, preto de 1.000 augas, 700 plátanos, máis de 600 xeles e barritas enerxéticas para os nadadores e organización e un forte dispositivo de seguridade tanto en mar como en terra, en colaboración co Monte Real Club de Yates de Baiona.
A organización tamén agradeceu o apoio dos patrocinadores Abanca, Head, a Deputación de Pontevedra, Gadis, M+ Q España, Galicia Calidade, o concesionario Hyundai Hyupersa e Arraianos Produccións. Ademais, colaboran Powerade, Froitas Sol, Adegas Val Miñor, Parador de Turismo de Baiona, Comunica, Porto Deportivo de Baiona, Boyer Triathlon Vigo, Clubnatacion. com e Aceba, entre outros.
De acordo cos plans da organización, o pistoletazo de saída darase ás 09:15 horas na praia de Rodas, nas Illas Cíes, coa saída do primeiro grupo (lento) integrado por 41 nadadores. O segundo, con 43 nadadores, farao ás 09:35 horas; o terceiro con 33, ás 09:55 horas. O cuarto, con 30 nadadores, sairá ás 10:15 horas e, o último, o máis rápido formado por 14 nadadores, tomará a saída ás 10:35 horas.
Desde aí os nadadores dirixiranse cara á illa Sur das Cíes, a 4 km de distancia, onde estará situado o primeiro barco de control e avituallamiento da travesía, á altura de Punta Xesteira, onde os nadadores poderán repoñer forzas con bebidas e comida (plátanos, barritas enerxéticas e xeles).
O segundo barco de control e avituallamiento estará situado no quilómetro 8, antes de chegar ao paso entre a península de Monteferro e as illas Estelas e, o terceiro, no quilómetro 12, dentro da baía de Baiona, á altura do Faro-Baliza de Cabezo de San Juan. A partir de aquí, quedarán tres quilómetros antes de chegar ao momento de meta situado na praia de Ribeira, en Baiona, pasando antes pola réplica da carabela Pinta.
Calcúlase que o primeiro nadador en chegar culmine a proba en tres horas e media (hora aproximada de chegada do primeiro nadador: 14:00 horas), pero estímase que o resto de participantes poidan prolongar o seu esforzo durante catro ou mesmo cinco horas máis.
No caso das que as condicións meteorolóxicas sexan adversas, a organización ten previsto un percorrido alternativo dentro da baía de Baiona de 15 km con saída e chegada na praia de Ribeira.
Forte dispositivo de seguridade
Durante a travesía despregarase un forte dispositivo de seguridade integrado por 30 embarcacións, 32 kaiaks, 13 pádel surf, 3 motos acuáticas, 2 médicos, tres enfermeiros, 12 socorristas, 1 técnico en emerxencias sanitarias, 1 ambulancia medicalizada e preto de 200 persoas en terra e mar, que estarán coordinadas por Carlos Agra, contramaestre do Real Club Náutico de Sanxenxo. Haberá un posto de vixilancia no paso entre Monteferro e as Illas Ronseis e un posto de Protección Civil na chegada.
Para velar pola seguridade dos nadadores a organización conta coa colaboración do Real Club de Yates de Baiona, Club Náutico de Panxón, Náutico de Canido, Protección Civil de Vigo e Val Miñor, Gardacostas de Galicia, Parque Nacional dás Illas Altánticas de Galicia, Bombeiros de Vigo, Confraría de Pescadores de Baiona, Garda Civil de Mar, Wetsports Ladeira, Baysub, Kailúa, Club deportivo PescaCíes e Nordés Kayak, entre outros.
En total entregaranse premios aos tres primeiros clasificados da categoría masculina e feminina nun acto que terá lugar o sábado, a partir das 21:00 horas, na pradería do Enxebre Pinta, no Parador de Turismo de Baiona. Ademais, celebrarase un sorteo de agasallos cedidos polas firmas patrocinadoras e colaboradoras.
Actividades paralelas
Paralelamente á travesía celebraranse diversas actividades paralelas para os familiares e acompañantes como unha visita guiada ao centro histórico de Baiona e a ruta Pinzoniana (inclúe unha visita á réplica da carabela Pinta) grazas á colaboración das concellerías de Turismo e Cultura do Concello de Baiona. A esta visita participarán máis de 60 persoas. Tamén, está prevista outra visita ás Illas Cíes, acompañados con persoal do Parque Nacional dás Illas Atlánticas, de dúas horas e media de duración. Ao finalizar, realizarase unha limpeza da praia de Rodas, en colaboración co Parque e Coca-Cola. Nesta visita inscribíronse máis de 50 persoas.
A Triple Corona Illas Atlánticas é un reto de carácter competitivo que consiste en tres probas de natación cun percorrido total de 57 quilómetros que se disputan en augas das Rías Baixas os tres próximos anos, entre 2018 e 2020. Este evento deportivo, organizado pola empresa Atlantic Extrem Sports é unha das citas máis importantes a nivel nacional e estranxeiro dentro do circuíto de natación de augas abertas.
A Triple Corona Illas Atlánticas, 57km a nado, consta de tres probas de natación de 15, 19 e 23 km de distancia –esta última unha das máis duras do continente europeo– que se celebran nas rías de Vigo, Arousa e Pontevedra, entre 2018 e 2020. Cada unha das tres travesías sae dunha illa do Parque Nacional: Cíes, Sálvora e Ons, respectivamente.
A primeira das tres probas, de 15 km, celébrase entre as Illas Cíes e Baiona. A segunda terá lugar entre a illa de Sálvora e O Grove, con 15 km de percorrido, en 2019. A última, a máis longa con 23 km, arrincará da Illa de Ons e terminará en Combarro, pasando pola Illa de Tambo en 2020.
Os obxectivos deste reto son poñer en valor a riqueza natural das Illas Atlánticas, promocionar as Rías Baixas e converter este desafío deportivo nunha das probas de natación de referencia en España e Europa.
