A XXXIII edición da Gala Nacional de Piragüismo que se celebrará o próximo 30 de xaneiro no Auditorio Goyeneche do Comité Olímpico Español terá entre os premiados a 5 deportistas galegos que este ano brillaron cos seus resultados.
Óscar Carreira e Rodrigo Germade recibirán o premio ao mellor deportista masculino compartido co resto de compoñentes da embarcación de K4 que conseguiu o pase para os Xogos Olímpicos de Río 2016. O reto destes dous campións galegos é o de conseguir unha medalla olímpica.
Teresa Portela terá que compartir o premio á mellor deportista feminina con Maialen Charreaut da modalidade de Slalom. A medalla de bronce no pasado mundial deulle o pase aos seus 5º xogos olímpicos onde buscará a medalla que lle falta na súa palmarés.
O premio ao mellor deportista promesa masculina Sub 23 é para Roi Rodríguez Puertas do Club Kaiak Tudense grazas ás súas dúas medallas de Ouro que conseguiu no mundial Sub 23 que se disputou en Portugal.
Camila Morisón do Club Náutico Pontecesures será galardoada co premio á mellor deportista promesa Junior, o cuarto posto en K1 500 do mundial junior e a súa medalla de bronce en lle K2 1000m no campionato de Europa fana merecedora do premio.
O momento máis emotivo da gala será cando se lle faga entrega a David Cal da súa mención por toda a súa carreira deportiva, onde destacan as súas cinco medallas olímpicas.
A todos estes galardoados hai que sumarlle os clubs premiados polos seus resultados nas distintas competicións nacionais como son o Club Kaiak Tudense, que conquistou o subcampeonato da liga de Pista Hernando Quella, a Copa do Rei e a primeira edición da Copa da Raíña, o Club As Torres polo seu segundo posto na liga Nacional de Novas Promesas, os ferroláns do Club Piragüismo Copacabana que terminaron en terceira posición na XVII Liga de Kaiak-Polo 2015 e Os monfortinos do Club Piragüismo Quixos que recibirán o trofeo pola súa terceira posición na X Liga de Descenso de Augas Bravas 2015.
