O Concello de Baiona recibiu este xoves na Feira Internacional de Turismo (Fitur) que se está a celebrar en Madrid o premio Quality Coast Gold Award, segunda cualificación máis alta do proxecto, o que certifica a aposta pola sustentabilidade turística e medioambiental.
Baiona logrou unha puntuación de 8 sobre 10 en catro das cinco categorías, polo que conseguiu chegar á categoría de ouro e superar todas as puntuacións coas que xa se presentara por primeira vez no ano 2013 acadando tamén o premio.
Ademais, ao longo do ano pasado, Quality Coast tamén elixiu unha práctica realizada en Baiona para expoñela en varios foros de turismo sustentable: a Escola de Vela Adaptada do Monte Real Club de Yates.
“O premio ven a certificar a nosa aposta polo turismo de calidade sen esquecernos do medio ambiente e da sustentabilidade, é o recoñecemento ao traballo ben feito durante os últimos anos dende o Concello de Baiona”, afirmou Ángel Rodal.
O programa Quality Coast está desenrolado pola Coastal and Marine Union, con sede en Holanda, co obxectivo de fomentar a sustentabilidade nos destinos costeiros, establecendo unha rede mundial de comunidades costeiras cos mesmos valores e prácticas medioambientais.
O criterios para elixir estes destinos teñen en conta o ecosistema mariño, a conservación, actividades económicas, oferta turística, seguridade, patrimonio natural e cultural do destino, así como a beleza natural e a calidade medioambiental.
Este premio únese ao conseguido o pasado mes de setembro cando a plataforma medioambiental “Green Destinations” incluíu a Baiona entre os 100 destinos máis sostibles do mundo.
Os aspectos valorados para a concesión dos premios foron a creación do espazo mariño protexido das Rías Baixas, a recuperación de praias e dunas da Ladeira, o modelo de xestión da auga potable, as bandeiras azuis das praias e do Club de Yates, a protección do Casco Histórico de Baiona, a implantación do Sistema Integral de Calidad Turística en Destinos (Sicted) desde 2004, a mellora do transporte público, a participación de Baiona no plan de compostaxe da Deputación de Pontevedra, a seguridade xeral do destino e a posta en marcha da patrulla medioambiental, así como a hospitalidade da poboación e coidado da cultura local.
