As Bibliotecas Municipais de Redondela renden homenaxe a Alicia no País das Marabillas, ao escritor Luis Coloma e ao editor Saturnino Calleja a través dunha pequena mostra bibliográfica
Cando se cumpren 150 anos da publicación de Alicia no País das Marabillas e o centenario das mortes do escritor Luís Coloma, autor do conto do Rato Pérez e de Saturnino Calleja, editor dos coñecidos como Contos de Calleja, as bibliotecas municipais de Redondela, dedican unha mostra bibliográfica aos mesmos, baixo o slogan “Temos moito conto”.
A mostra bibliográfica permanecerá na sala de adultos da Biblioteca Municipal do 4 ao 30 de novembro (Alicia no País das Marabillas) e do 2 ao 30 de decembro (Rato Pérez e contos de Calleja) e na Axencia Municipal de Lectura de Chapela do 2 ao 30 de decembro (Alicia no País das Marabillas) e do 4 ao 29 de xaneiro ( Rato Pérez e contos de Calleja)
“Temos moito conto” reune varias publicacións que reflicten por unha banda a evolución nas edicións da obra de Lewis Carroll, comezando pola do ano 1957 editada pola editorial Juventud con ilustracións da barcelonesa Lola Anglada e algunhas das publicacións facsímiles editadas por José J. de Olañeta da editorial Olañeta dos contos de Calleja e varios libros e merchandising sobre o entrañable personaxe do Rato Pérez, algúns deles doados por a Casa Museo del Ratón Pérez en Madrid.
Esta homenaxe completarase, no mes de decembro, coa emisión radiofónica, a través de Radio Redondela, de tres das historias dos famosos contos de Calleja.