Esta nova oferta pretende ampliar a posibilidade de participar nesta actividade, xa que a primeira convocatoria esgotou todas as prazas en tan só 48 horas
A Consellería de Medio Ambiente, Territorio e Infraestruturas realizará unha nova convocatoria neste inverno para participar na ruta guiada ‘Unha viaxe no tempo’, dado o éxito da primeira oferta, que esgotou as prazas en tan só 48 horas. Así o indicou hoxe a conselleira Ethel Vázquez, que saudou esta mañá aos preto de 40 participantes na primeira ruta guiada a Cíes para descubrir o patrimonio natural do Parque Nacional das Illas Atlánticas.
Trátase dunha iniciativa que pon en marcha o Parque Nacional Marítimo-Terrestre das Illas Atlánticas de Galicia por segundo ano consecutivo e que ten por obxectivo descubrir o patrimonio natural deste parque natural fóra dos meses estivais, nunha época de menor afluencia, e na que se descobre os seus valores dende outro punto de vista
A conselleira salientou que se trata dunha actividade de carácter divulgativo que ten como obxectivo principal dar o coñecer os trazos máis característicos das illas que forman o Parque natural; ao tempo que se conciencia da importancia do coidado e a conservación dun enclave natural inigualable, como é o caso das Illas Cíes.
Argumentou que se os galegos se animan a coñecer os valores paisaxísticos e a flora e a fauna do Parque nacional marítimo Terrestre das Illas Atlánticas, tamén se incentivará a súa conciencia sobre a importancia da preservación da riqueza natural de Galicia.
Salientou que en total organízanse cinco rutas e visitas guiadas gratuítas aos arquipélagos do Parque Nacional Illas Atlánticas, xa que – xunto coa de hoxe- celebrarase outra este mesmo mes á Illa de Sálvora, mentres que en marzo se prevé unha á Illa de Ons e dúas rutas á de Cortegada. Estas visitas fanse con grupos reducidos coa fin de poder ofrecer a máxima calidade de visita a este espazo protexido. A continuación detállanse as rutas que se ofertan:
Xornada | Illa | Ruta | Data limite inscrición | Participantes |
22 febreiro | Sálvora | Sálvora, Illa de esculturas e lendas | 17 febreiro | 22 |
7 marzo | Ons | Unha illa de nomes | 3 marzo | 17 |
5 marzo | Cortegada | O segredo dun bosque no mar | 1 marzo | 24 |
15 marzo | Cortegada | O segredo dun bosque no mar | 10 marzo | 24 |
Cómpre lembrar que a actividade será gratuíta na illa, pero cada persoa participante debe asumir o desprazamento ata o porto de saída e o transporte ao arquipélago, que deberá ser abonada antes de comezar o servizo.
Os interesados nestas actividades poderán acceder a información destas rutas na web do Parque Nacional (www.parquenacionalillasatlanticas.com), no apartado de actividades, onde poderán consultar as datas e realizar as inscricións.
