O vicepresidente da Xunta, Alfonso Rueda, participou esta mañá na presentación da terceira convocatoria do Programa de cooperación interuniversitaria da Eurorrexión, ‘Iacobus’, por parte da Agrupación Europea de Cooperación Territorial Galicia – Norte de Portugal (AECT).
No acto tamén participaron a directora da AECT, María Geraldes, o reitor da Universidade de Vigo, Salustiano Mato, e o presidente da Comisión de Coordinación e Desenvolvemento Rexional do Norte, Emídio Gomes.
O ‘Iacobus’ xa beneficiou a preto de 240 persoas, favorecendo áreas tan estratéxicas para Galicia e o norte de Portugal como a saúde, as TIC ou a enerxía
Rueda destacou o éxito do ‘Iacobus’, que nas dos edicións anteriores xa beneficiou a preto de 240 persoas, contribuíndo a facer da Eurorrexión un espazo común de investigación, innovación e emprendemento, especialmente en áreas tan estratéxicas como a saúde, as TIC e a enerxía, entre outras.
Un programa pioneiro en Europa
O ‘Iacobus’ é un programa de cooperación cultural, científica e pedagóxica da Eurorrexión, pioneiro en Europa e que se finanza grazas a unha contribución da UE, a través do Programa Operativo de Cooperación Transfronteiriza España – Portugal (POCTEC).
A AECT lanzou a súa primeira convocatoria en xullo de 2014, tres meses despois da sinatura dun protocolo entre os centros de Ensino Superior da Eurorrexión, en Vigo, nun acto no que tamén participou o presidente da Xunta de Galicia, Alberto Núñez Feijóo.
Nesa primeira convocatoria aprobáronse 118 candidaturas, das que 72 eran galegas e 46 portuguesas. 73 candidaturas eran de para persoal docente, 30 para investigadores e 15 para persoal de administración e servizos, PAS, incluíndo practicamente tódalas áreas científicas.
A segunda convocatoria presentouse en novembro de 2014 e contou con 119 seleccionados, 67 provintes dsa universidades galegas e 52 de Portugal. Como na primeira convocatoria, houbo unha grande diversidade de beneficiarios: 64 docentes, 24 PAS e 31 investigadores, algúns deles alumnos de terceiro ciclo ou bolseiros post-doutorais.
Once centros de ensino conectados
O programa ‘Iacobus’ pretende fomentar a cooperación e a mobilidade académica no espazo universitario luso-galaico, apostando polo desenvolvemento de proxectos formativos e de investigación científica comúns. Trátase dun proxecto de formación continua que xunta once institucións de ensino superior de Galicia e o Norte de Portugal.
Así, poden participar nel o persoal docente e investigador universitario e os PAS das tres universidades galegas; as portuguesas de Porto, do Minho, Trás-os-Montes e Alto Douro e Católica Portuguesa; e os Institutos Politécnicos do Porto, Bragança, Viana do Castelo e o do Cávado e do Ave.
[…] Ler máis […]
Citar Comentario
Citar Comentario