A primeira xornada da Feira do Viño do Rosal transcorreu con grande éxito, atraendo a numerosos visitantes e amantes do viño, así como a persoas interesadas polas actividades programadas para o día de onte.
O evento inaugurouse cunha cata profesional comentada de viños do Rosal a cargo de Fernando Gurucharri, antigo presidente da Unión Española de Catadores. Esta actividade permitiu aos participantes descubrir e apreciar a riqueza e diversidade dos viños rosaleiros baixo a dirección dun experto de renome, marcando un comezo perfecto para un día cheo de celebracións.
Tivo lugar o acto inaugural da Feira, evento que contou con institucións tanto autonómicas como provinciais e locais, achegando ata a Praza do Calvario a alcaldes e alcaldesas dos diferentes concellos da comarca e arredores. A tarde destacou coa celebración dun innovador Scape Room temático sobre o sector do viño. Esta actividade interactiva acolleu a cerca de 200 persoas, brindando unha experiencia única que combinou diversión e aprendizaxe sobre a tradición vitivinícola do Rosal. Os participantes puideron resolver pistas e desafíos relacionados co proceso de produción do viño, fomentando o coñecemento e a apreciación desta arte.
A xornada culminou cun vibrante concerto da Patrulla, quen interpretou versións de diversos artistas, facendo vibrar a unha Praza do Calvario repleta de xente de todas as idades. O entusiasmo e a alegría foron palpables, creando un ambiente festivo que promete un fin de semana inesquecible.
Para a xornada deste sábado estába prevista a celebración dunha cata dirixida pola sumiller Marina Cruces e pola tarde unha actividade de debuxo e ilustración para os máis peques, a cargo de Xosé Tomás. O toque musical o porán ao mediodía o grupo Brass Atlantic, quen tamén fará un pasarrúas pola praza ás 20.30h. A xornada rematará co concerto dos Revenidos, que interpretará diferentes versións que farán a pequenos e maiores bailar no final da xornada.
A Feira do Viño do Rosal continuará ata domingo con máis actividades como o taller de cociña para os máis pequenos a cargo de Isaac Míguez, ou o espectáculo de maxia e globoflexia, así como concertos con música ao vivo ao longo do día a cargo do Síndrome de Penny Lane e Helen & Shanna.
A Feira do Viño consolídase como un evento imprescindible para os amantes do viño de calidade e singularidade, así como da cultura, patrimonio e arte galega.
