O circo da Festa Escénica chega a Nigrán co espectáculo de gran formato Galtük, nome que nace da unión das palabras Galicia e Batukada, e que designa o lugar onde naceron os soños desta compañía, fai máis de dez anos.
O show circense, un espectáculo familiar ideado para divertir e emocionar a todas as idades, levará ao espectador a un lugar máxico da man da protagonista, unha nena valente e intrépida que vive todo tipo de aventuras acompañada de divertidos personaxes que a axudarán a avanzar superando as adversidades que se lle van presentando ao longo da súa particular viaxe.
O circo permanecerá enNigrán entre o 3 e o 24 de agosto na chaira de Montelourido, en Praia América, con sesións todos os días ás 20.30 horas. Os prezos das entradas varían segundo a zona, oscilando entre os 10 e os 15 euros.
Obradoiros circenses para nenos
Ademais, polas mañás impartiranse obradoiros de circo para nenos de entre 7 e 12 anos, unha sorte de campamento de circo que se celebrará de luns a venres entre as 11.30 e as 13.00 horas, no que os asistentes poderán dar os seus primeiros pasos na arte dos malabares e outras disciplinas circenses. Máis información sobre estos obradoiros na taquilla do circo.
