A Consellería do Mar destaca a importancia da Feira Xantar de Ourense como plataforma promocional dos produtos do mar de Galicia no panorama nacional e internacional. Así o trasladou o director xeral de Pesca, Acuicultura e Innovación Tecnolóxica, Juan Maneiro, que participou no día dedicado ao mar no Salón Internacional de Turismo Gastronómico, que se celebra na cidade de Ourense desde o pasado mércores, 3 de febreiro, ata o domingo día 7.
Juan Maneiro felicitou aos promotores e organizadores do evento e salientou que a feira Xantar convértese nun escaparate no único salón internacional especializado na promoción gastronómica a través do turismo. Así, destacou que a nosa comunidade é a mellor tenda gourmet de España e que así o acreditan os nosos produtos do mar e da terra. Nesta liña, o director xeral sinalou que este é un privilexio que temos que coidar e fomentar, porque milleiros de familias desenvolven a súa actividade no complexo Mar-Industria.
Finalmente, Juan Maneiro resaltou o prestixio dos produtos alimentarios galegos e destacou que o nome de Galicia asociado á gastronomía é sinónimo de calidade, tradición e autenticidade. Ao tempo, fixo especial énfase na calidade e frescura do marisco e dos peixes procedentes da pesca artesanal.
Actividades da Consellería na feira
A Consellería do Mar está presente na décimo sétima edición deste salón cun posto institucional duns 60 m2 e ademais organiza diferentes degustacións. No día de hoxe as protagonistas foron as conservas. O cociñeiro Flavio Morganti, do restaurante Galileo de Ourense realizou as receitas Evolución de atún, Sardiñas crocantes á provenzal, Mar e Montaña con Mexillón de Galicia e Castaña de Galicia vs laranxas. Para acompañar a cata destes pratos haberá viños da D.O. Ribeiro.
