Os finalistas da 44ª edición do galardón son Armando Álvarez, por unha columna publicada en Faro de Vigo; José María Paz Gago, por unha colaboración con ABC, e María Sánchez Rodríguez, que presentou un artigo publicado en La Vanguardia
No ano no que por primeira vez dous expertos latinoamericanos se suman ao xurado do Premio Internacional Afundación Julio Camba, o galardón entregarase na Casa de América (Madrid). Será na vindeira semana, o martes 16 de xaneiro. O xurado decidirá esa mesma mañá cal dos tres artigos declarados finalistas no pasado mes de novembro merecerá o galardón, dotado con 10.000 euros. O escritor Alfredo Conde preside o xurado, ao que este ano se sumaron por primeira vez como vogais o literato e exvicepresidente de Nicaragua Sergio Ramírez, e mais o director da Fundación Gabo, o colombiano Jaime Abello Banfi. Xa confirmaron asistencia ao evento de entrega importantes xornalistas, incluídos correspondentes de medios estranxeiros, e persoas do ámbito da cultura.
Os finalistas son o xornalista de Faro de Vigo Armando Álvarez pola columna «El glaciar y la luz»; o catedrático de Teoría da Literatura e Literatura Comparada José María Paz Gago, autor do artigo «La pluma y la pistola», publicado en ABC; e a veterinaria e escritora cordobesa María Sánchez Rodríguez, colaboradora habitual de La Vanguardia, polo artigo «Escoitar os mortos»;
A decisión será tomada por un xurado que completan os escritores e xornalistas Cristina Sánchez-Andrade, Bibiana Candia, Ramón Pernas e Manuel de Lorenzo. O director de Comunicación de ABANCA, Isaac González Toribio, actúa como secretario.
Ponte con América Latina e o Caribe
A organización do evento de entrega na Casa de América chega nun momento no que o Premio Internacional Afundación de Periodismo Julio Camba está implementando unha serie de cambios cos que a Obra Social de ABANCA busca, entre outros obxectivos, promover o diálogo entre articulistas e lectores de diferentes territorios de América e Europa.
A Casa de América é un consorcio público que ten como obxectivo estreitar os vínculos entre España e o continente americano, especialmente en América Latina e o Caribe. Ocupa o céntrico Pazo de Linares de Madrid, na Praza Cibeles, construído no último cuarto do século XIX e que mantén a extraordinaria arquitectura e decoración cos que foi concibido.
A persoa elixida na XLIV edición do Premio Internacional Afundación de Xornalismo Julio Camba sumarase á extensa nómina de persoas premiadas desde 1980: Gonzalo Fernández de la Mora, Luciano del Río Besada, Carlos García Bayón, Alfredo Conde, Bernardo Víctor Carande, Antonio Odriozola, Raimundo García Fernández, Adolfo Prego, José Montero Alonso, Rafael Landín Carrasco, Julio Sierra, Xesús Ferro Ruibal, Arturo Lezcano Fernández, Santiago Castelo, Torcuato Luca de Tena, Carlos Casares, Miguel Ángel Cuadrado, Juan Manuel de Prada Blanco, Diego Bernal López, Alfonso Eire López, César Casal González, Miguel Suárez Abel, Manuel Rivas Barros, Manuel Jabois Sueiro, Marino Gómez Santos, Eugenio Fuente, Fernando Savater, Felipe Benítez Reyes, Andrés Trapiello, Pedro Ugarte Tamayo, Ángela Vallvey Arévalo, Ramón Pernas López, José Manuel Otero Lastres, Ángeles Caso, Luis Ventoso, Ignacio Camacho, Ramón Loureiro Calvo, Miguel Anxo Murado, Ricardo Fernández Colmenero, Cristina Sánchez Andrade, Luis Pousa, Bibiana Candia y Manuel de Lorenzo Paradela, gañador da pasada edición.
