A moza deportista do Porriño, falecida hai dúas semanas nun accidente coa súa bicicleta mentres descendía o Angliru, era unha habitual na carreira entre Oia e A Guarda.
A 15K do Atlántico-Banco Mediolanum renderá homenaxe o vindeiro domingo a María Ferreira, a moza do Porriño falecida hai dúas semanas tras sufrir un accidente coa súa bicicleta cando descendía o Angliru, onde acudira para ver unha etapa da Volta a España.
María Ferreira era unha habitual nesta carreira entre Oia e A Guarda que abre o calendario de outono. Por iso, a organización decidiu renderlle tributo antes do inicio da proba, gardando un respectuoso minuto de silencio e facendo entrega da camiseta da carreira, co número uno e o seu nome, aos seus compañeiros do equipo Runners Potakas.
