A céntrica rúa Carabela Pinta de Baiona converteuse nun improvisado taller de manualidades con materiais reciclados con máis de medio centenar de protagonistas. 60 nenos e nenas que participan da Escola de Verán do Concello de Baiona compartiron a actividade con usuarios do centro de formación ocupacional para persoas con discapacidade Juan María de Parada. A mesma actividade foi protagonizada no parque da Ramallosa polos 60 nenos e nenas que participan na escola de verán no colexio de Sabarís.
Os pequenos e os alumnos do Juan María gozaron dunha mañá moi enriquecedora na que a axuda foi mutua. Entre as actividades que compartiron están a elaboración de deseños sinxelos a partir de cartón e pinzas da roupa, a construción de “esculturas” a partir da ensamblaxe de elementos chairos de cartón ou a elaboración de “esculturas” con arame e contas de cores?
Os mozos e mozas do Juan María estaban entusiasmados axudando aos máis pequenos, a Directora do centro manifestou que este tipo de actividades nas que os alumnos do centro participan con nenos é fundamental para a inclusión real de persoas con discapacidade intelectual. Ademais, esta actividade axudará aos máis pequenos no seu desenvolvemento persoal. Á vez que se divirten aprenderán unha gran lección. Asimilarán o importante que é a diversidade, o compartir, o axudar etc.
Ángel Rodal, alcalde de Baiona visitou o taller e felicitou aos usuarios polo resultado dos seus traballos, que “dan mostra das capacidades do colectivo”, subliñaba. Un logro no que tamén ten que ver moito a implicación dos profesionais do centro, indispensable -engadía- para fortalecer a súa integración na sociedade.
