A Presidenta da Deputación de Pontevedra, Carmela Silva, e o Reitor da Universidade de Vigo, Salustiano Mato, asinaron hoxe o primeiro protocolo de colaboración institucional que define o marco de relación entre ambos organismos para os próximos catro anos. Mediante este protocolo ambas as dúas entidades promoverán a cooperación para o desenvolvemento científico e tecnolóxico, procurando unha aplicación práctica do coñecemento en proveito da sociedade.
O impulso dos proxectos de especialización CREA S2i, no campus de Pontevedra, e Vigo Tecnolóxico, a promoción do emprego e o emprendemento xuvenil na provincia, a colaboración en actividades de captación do alumnado con mellor traxectoria académica ou o apoio dos expertos e expertas da institución académica nos proxectos da Deputación son algúns dos eixos do primeiro marco de colaboración para un período de catro anos que a Deputación Provincial subscribe coa Universidade, a fin de aproveitar o talento e o coñecemento da institución académica.
A Presidenta da Deputación mostrou a súa total satisfacción pola consecución deste acordo, cuxas accións se desenvolverán a través de convenios específicos e mediante a convocatoria pública de axudas. “Hoxe damos un paso enormemente relevante porque as universidades teñen que estar presentes nas administracións. As que non o entendan serán erradas. Na Universidade está o coñecemento pero se iso non se converte en proxectos que revertan na mellora da vida das persoas, todo queda en principios e en discursos. Nós damos ese paso, é fundamental implantar ese novo modelo e non podemos esperar máis, engadiu.
Silva dixo que, ademais era unha honra que unha universidade tan recoñecida e con tantos proxectos de éxito entrase na Deputación “pola porta grande” e asegurou que “serán tantos os retornos que terá a provincia con este acordo que esta nova forma de traballar durará moitos anos independentemente de quen goberne”
Pola súa banda, ou Reitor da Universidade de Vigo, Salustiano Mato, cualificou o acordo de “histórico” e avanzou que de forma previa á constitución da comisión mixta encargada de definir os plans de anuais de traballo que desenvolverán este protocolo, as dúas institucións xa están a colaborar en varios campos como o tratamento de residuos, a sostenibilidade, a reutilización, a innovación ou a calidade.
“Somos un modelo de Universidade que quere mirar á sociedade e trasladarlle o seu talento para darlle músculo, potencia e crecemento económico á súa contorna”, salientou Mato quen puxo de relevo a importancia de transferir o coñecemento xerado na institución académica á sociedade, xa que “canto máis fagamos estas cousas máis e mellor nos vai comprender a xente”. Nese senso, Mato destacou que “para nós a Deputación é unha institución absolutamente estratéxica para poder chegar a toda a provincia”. Por iso, puxo en valor un protocolo que “dótanos dunha sistemática de traballo” para os próximos catro anos. “Esta maridaxe é o mellor exemplo de que dúas institucións poden ser complementarias e traballar xuntas de forma sostida no tempo para conseguir obxectivos concretos”, sinalou.
Nun prazo de quince días procederase á constitución dunha Comisión Mixta que elaborará o plan anual de actividades e marcará a axenda dos temas prioritarios que repercutirán en áreas sensibles para o progreso da provincia, que contribuirán a modernizala, a traballar en rede e a aplicar os principios do bo goberno. Segundo se estipula no documento asinado nesta xornada, esas accións desenvolveranse posteriormente por grupos de traballo con técnicos de ambos organismos.
Entre os obxectivos deste Protocolo está o impulso dos proxectos de especialización CREA S2i, do campus de Pontevedra e Vigo Tecnolóxico; a organización e realización de todo tipo de actividades académicas que favorezan a formación continua do persoal da Deputación e os 62 concellos; o impulso do emprego e emprendemento xuvenil na provincia e a colaboración en actividades de captación dos estudantes con mellor traxectoria académica para que continúen a súa formación na Universidade de Vigo. Así mesmo, o acordo tamén abrangue a promoción da mobilidade de estudantes e docentes a nivel internacional; facilitar a xestión do aloxamento dos estudantes a través do impulso ás residencias universitarias e a bolsa de pisos; a colaboración nos programas de captación de recursos, especialmente europeos; o apoio dos expertos da Universidade en todos os temas de interese da Deputación relativos a equilibrio territorial, medio ambiente, turismo ou patrimonio; proxectos culturais; ou a promoción da igualdade de oportunidades entre mulleres e homes en todos os ámbitos da sociedade
O vindeiro martes a Presidenta da Deputación e o Reitor da Universidade de Vigo asinarán o primeiro convenio froito deste protocolo, polo que 150 universitarios con poucos recursos económicos poderán ser seleccionados nas convocatorias de Erasmus+ para realizar estudos en universidades europeas ou prácticas formativas en empresas e institucións doutros países. Son 150 bolsas de 1000 euros cada unha. En total: unha contía de 150.000 euros