spot_img
InicioGaliciaSeis concellos acollen as xuntanzas da Rede Municipalista Solidaria do Fondo Galego

Seis concellos acollen as xuntanzas da Rede Municipalista Solidaria do Fondo Galego

seis-concellos-acollen-as-xuntanzas-da-rede-municipalista-solidaria-do-fondo-galego

Os concellos da Estrada, Lugo, Ourense, Teo, Betanzos e Moaña acollerán entre o 28 e o 30 de marzo as xuntanzas da Rede Municipalista Solidaria, conformada por persoal das administracións locais e provinciais integradas no Fondo Galego de Cooperación e Solidariedade. Nestes encontros, a Secretaría Técnica da entidade dá conta dos proxectos de desenvolvemento apoiados en países do Sur coas cotas que achegan as deputacións e concellos socios, ao tempo que informa das actividades que poden implementar en 2016 para concienciar fronte as desigualdades.

comillasOs encontros con persoal técnico das administracións socias celebraranse na Estrada, Lugo, Ourense, Teo, Betanzos e Moaña entre o 28 e o 30 de marzo

Todas as reunións darán comezo ás 10.30 horas e as técnicas e técnicos delegados do Fondo Galego poden escoller a cal acudir. A sesión abrirase cun repaso das novas Liñas Estratéxicas 2016-2019, que avogan pola incorporación de máis municipios a esta rede solidaria. Revisarase logo o Plan 2016 e as accións previstas nas áreas de fortalecemento, sensibilización, proxectos e comunicación. Exposicións, actuacións musicais, contacontos, charlas ou obradoiros de calceta son algunhas das actividades que os socios poden solicitar.

comillasA Secretaría dá conta nestas citas dos proxectos de cooperación internacional e das actividades de sensibilización que poden implementar ao longo deste ano

A iniciativa europea Redes para o Desenvolvemento ou o concurso Imaxes con Fondo son outras das actuacións sobre as que se informará, así coma do programa de voluntariado internacional Vacacións con Traballo, que será explicado por unha das participantes, ou do intercambio de experiencias que alcaldesas e concelleiras galegas levarán a cabo en Mozambique. No eido da cooperación internacional, amosaranse os resultados do proxecto a prol da saúde infantil e materna apoiado neste país lusófono e da achega para a reconstrución dun centro sanitario nos campamentos saharauís.

As xuntanzas da Rede Municipalista Solidaria coa Secretaría do Fondo Galego de Cooperación celébranse cada seis meses co obxectivo de render contas e favorecer un contacto directo que garanta correcto funcionamento da asociación. O intercambio de ideas e opinións que se xera permite unha boa circulación da información, a comunicación e a transparencia, imprescindibles para realizar un traballo eficaz.

O Fondo Galego

O Fondo Galego de Cooperación e Solidariedade está integrado por 84 concellos e as deputacións da Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en 25 países e promove numerosas actividades e materiais en relación aos desequilibrios Norte-Sur.

CALENDARIO DAS RMS

28/03/2016. Concello da Estrada. Museo do Moble (Avda. Benito Vigo, 92).

28/03/2016. Concello de Lugo. Centro ‘Uxío Novoneyra’ (R/ Quiroga Ballesteros, 1A).

29/03/2016. Concello de Teo. Casa do Concello (Travesía da Ramallosa, 38).

29/03/2016. Concello de Ourense. Centro de Iniciativas Empresariais (R/ Padre Feijoo, 1).

30/03/2016. Concello de Moaña. Patronato Municipal Beiramar (A Carrasqueira, s/n – Tirán).

30/03/2016. Concello de Betanzos. Edificio Liceo (Praza de Galicia, 1).

ORDE DO DÍA DAS RMS

  1. Liñas Estratéxicas 2016-2019
  2. Plan de sensibilización e comunicación 2016
  3. Presentación Vacacións con Traballo
  4. Plan de proxectos de cooperación 2016
  5. Rogos, preguntas, suxestións.

 

- Publicidade -spot_img