As entradas para o concerto do solpor do 5 de agosto están esgotadas e agora o Concello abre a oportunidade para o 6 de agosto, que se suma á sesión matinal dese mesmo día
O Concello de Nigrán ofrecerá este verán finalmente tres concertos de Carlos Núñez no miradoiro de Monteferro. O gaiteiro internacional anuncia unha nova oportunidade para gozar da súa música no solpor máis fermoso de Galicia o 6 de Agosto ás 20:00 horas (para o día anterior as entradas están esgotadas). Esta posibilidade súmase á da sesión matinal do 6 de agosto ás 11:00 horas. Para ambas citas as entradas xa están á venda a través de Ataquilla cun prezo de 23 €. Os concertos, encadrados na xira ‘Lugares Máxicos’, forman parte da programación estival do Concello de Nigrán e contan co apoio da Deputación de Pontevedra a través da liña 2 do Plan Concellos.
Tal e como arrancaron no 2020, o obxectivo é enfeitizar aos asistentes grazas a súa especial sinerxia coa natureza. “Xuntamos ao mellor gaiteiro do mundo no que nos consideramos o mellor escenario do mundo, unha unión que resulta máis que fascinante”, reitera o alcalde, Juan González.
“Monteferro é un deses paraísos onde as veces veño a tocar, pero na intimidade, só para min e para a natureza. A diferencia cos de lugares como Bahía, Rio de Janeiro, ou California é que, mentres que alí a xente aplaude como se o sol e a terra ofrecesen un show, nós cecais sentímos ese intre como unha cerimonia. Según os nosos arqueólogos, os antigos habitantes de Monteferro e dos castros da costa de Galicia xa sabían moito de todas estas cousas…. Por iso, neste concerto repetirei o soño de compartir esas experiencias cos meus amigos músicos e co noso querido público. Seremos unha gran familia!”, sinala o propio Carlos Núñez, quen ten tocado dentro desta xira ‘Lugares Máxicos’ en espazos tan singulares de Galicia como o Mosteiro de Oseira, o Dolmen de Dombate ou a Catedral de Mondoñedo.
Co obxectivo de respectar ao máximo á singularidade deste espazo natural e de facelo coa mínima intervención, só se reservarán cadeiras para persoas con problemas xustificados de mobilidade, xa que o obxectivo é gozar da música sentados no propio chan, nun ambiente íntimo e en comunión coa contorna.
