Sanxenxo suma un novo distintivo á súa longa lista en praias e sendeiros, a Bandeira Verde de Galicia, como recoñecemento ás boas prácticas coa conservación, a protección da paisaxe e do medio ambiente
O municipio presentou á convocatoria un total de nove acciones: A senda fluvial de Dorrón, a actuación na contorna do colexio de Portonovo, a posta en valor das dunas e mellora de accesibilidade na praia de Areas, melloras de eficiencia enerxética no parque empresarial de Nantes, o fomento de compostaxe con dous novos composteiros e a repartición de composteiros individuais, así como a posta en marcha do punto limpo móbil e o punto limpo de proximidade.
O concelleiro de Medio Ambiente, Yago Torres, acudiu ao municipio ourensán de Porqueira para recoller a Bandeira Verde de Galicia. “Este distintivo supón un recoñecemento polo traballo realizado, pero tamén nos esixe seguir mellorando na xestión de residuos, na eficiencia enerxética e na loita contra ou cambio climático”, dixo.
Un traballo de fondo que leva realizando nos últimos anos. En 2019, aprobouse o Plan de Mobilidade Sustentable do Concello de Sanxenxo que é un documento de desenvolvemento estratéxico do territorio baixo unha visión integradora que ten por finalidade formular un conxunto de estratexias e actuacións orientadas á implantación de formas de desprazamento máis sostibles que fagan compatibles o desenvolvemento económico, a cohesión social e a defensa do medio ambiente, garantindo así unha mellor calidade de vida dos veciños e veciñas.
