Con só 26 anos e unha cerrera prometedora, Carlos Manera será distinguido cun de premios patrocinados por Terras Gauda na gala que celebrará o Monte Real Club de Yates o próximo 7 de setembro
Aos seus 26 anos, Carlos Manera xa fixo historia na vela española. Os Premios Nacionais de Vela Terras Gauda recoñecerán este ano o traballo do navegante madrileño, que en 2023 converteuse en gañador da primeira etapa da Mini Transat e subcampión absoluto e logrou facerse tamén cos títulos da Transat Niji 40, o circuíto Mini, a Mini Fastnet e Mini en Mai.
“Ser distinguido con este galardón é un orgullo moi grande e especial, sobre todo porque non somos moitos os navegantes en solitario en España nin hai unha gran cultura da vela de altura, polo que recibir o Premio Nacional significa que hai moita esperanza de que esta modalidade siga crecendo e dando grandes alegrías a este deporte”, afirma Manera.
A bordo do seu pequeno veleiro de seis metros e medio de eslora, navegando en solitario, sen asistencia e sen comunicacións, o regatista madrileño afincado en Lorient, na Bretaña francesa, lanzouse a disputar en 2021 a súa primeira Mini Transat. Un primeiro contacto coa mítica regata que lle levou a marcarse como obxectivo prepararse a fondo para buscar un bo resultado na seguinte edición.
Así, dous anos despois Manera plantouse na liña de saída da Mini Transat 2023 para converterse no segundo español en subirse ao segundo caixón do podio final. Fíxoo, ademais, con vitoria na primeira etapa entre Lles Sabres d´Olonne, en Francia, e a illa canaria da Palma e asinando un segundo posto na travesía final ata a illa de Guadalupe.
Tal e como el mesmo afirma, “un dos recordos máis especiais que teño evidentemente é o de gañar esa primeira etapa. Foi unha etapa moi, moi dura e cunha chegada en augas españolas que foi moi especial, sobre todo pola maneira na que gañei nas dúas últimas millas”.
Cunha carreira deportiva prometedora, o Premio Nacional de Vela ao mellor navegante en solitario pasará a formar parte dun palmarés que todo apunta a que seguirá acumulando títulos.
“Este premio quérollo dedicar aos meus pais, principalmente ao meu pai Salvador xa que sen el isto non sería posible. Aínda nos seus peores momentos de saúde seguiume apoiando para que eu poida continuar coa miña carreira deportiva”, finaliza Manera.
A gala dos Premios Nacionais de Vela Terras Gauda celebrarase o próximo 7 de setembro no Monte Real Club de Yates, dentro da programación da trixésimo novena edición do Trofeo Príncipe de Asturias. Nos próximos días iranse desvelando os nomes do resto de premiados.
