Tres vitorias nas tres regatas disputadas na baía de Baiona afastan ao barco patroneado por Miguel Lago dos seus rivais na liga de monotipos
O Virazón do Monte Real Club de Yates consolida o seu liderado na liga SabadellGallego Clase J80 tras os fantásticos resultados conseguidos na segunda xornada da competición, celebrada este sábado na baía de Baiona.
A tripulación patroneada por Miguel Lago logrou tres primeiros postos nas tres probas disputadas esta tarde, con ondas duns 3 metros e un vento que se mantivo nuns 14 nós ata o final da competición, cando caeu en intensidade.
O seu maior rival na auga volveu ser, un día máis, o Alumisel de Guillermo Caamaño. Deu guerra en todas as mangas, pero non logrou desbancar ao Virazón da primeira posición en ningunha delas. Ambos seguen primeiro e segundo na clasificación xeral, pero a distancia mínima que lles separaba tras a primeira xornada, de apenas un punto, é agora xa de 7 puntos.
Onde si se rexistraron cambios foi no terceiro caixón do podio provisional, que ocupa agora o Lúa Nova de Juan Luís Tuero, tras desbancar ao Ferralemes de Enrique Porto, ausente nesta segunda xornada da competición.
O Namasté de Luís de Mira e o Pazo de Cea de María Campoggs completan a clasificación da liga de Clase J80 organizada polo Monte Real Club de Yates e patrocinada por SabadellGallego, coa colaboración de Vitaldent e a Xunta de Galicia.
A competición, patrocinada por SabadellGallego, e coa colaboración de Vitaldent e a Xunta de Galicia, continúa o próximo 14 de novembro en Baiona
A competición continuará o próximo 14 de novembro cunha nova xornada na baía de Baiona. Antes da entrega de premios celebraranse outras tres probas máis, o día 28 de novembro.
