Inicio Galicia O sector turístico de Galicia conta con 273 establecementos coa distinción Q...

O sector turístico de Galicia conta con 273 establecementos coa distinción Q de calidade, máis do dobre que en 2007

o-sector-turistico-de-galicia-conta-con-273-establecementos-coa-distincion-q-de-calidade-mais-do-dobre-que-en-2007O presidente da Xunta de Galicia, Alberto Núñez Feijóo, que presidiu onte o acto de entrega dos recoñecementos Q de Calidade Turística 2017, animou a seguir apostando pola máxima calidade como marca dun sector turístico que conta con 273 establecementos coa Q de calidade, máis do dobre que en 2007.

Logo de destacar que investir e mellorar a calidade é sempre a opción máis rendible, no curto, medio e longo prazo, Feijóo aseverou que non é casualidade que Galicia sexa a primeira comunidade de España por número destas distincións. Non en van, recordou que a profesionalización e o compromiso do sector, o impulso das administracións e a implicación colectiva fixeron posible que Galicia leve tres anos consecutivos batendo récords.

Ao respecto, subliñou que en 2017 por primeira vez se chegou a máis de 5,1 millóns de turistas; ás 10,6 millóns de noites e incrementouse un 8,6% o número de pernoitas de turistas internacionais. “É dicir, acadamos un crecemento sostido no número de visitantes, con cada vez máis noites por turista e mellor repartidos ao longo do ano”, precisou, ao que engadiu que, ademais seguen mellorando os ingresos por habitación e a facturación total do sector hoteleiro creceu un 9,4% ata os 300 millóns de euros.

Durante a entrega dos recoñecementos Q de Calidade Turística 2017, o presidente da Xunta aseverou que este acto pon de manifesto o camiño do sector cara á especialización. Así, a comunidade ten: o 64% das Q de calidade en instalacións náutico-deportivas; a metade das casas de turismo rural de España con este recoñecemento e un de cada catro balnearios.

Neste último eido, o do turismo termal, Feijóo destacou o importante esforzo que Galicia está a facer para dar a coñecer a súa riqueza, con máis de 300 mananciais e 20 balnearios que fan que a comunidade sexa a primeira potencia termal de España e a segunda de Europa.

Así mesmo, recordou que a futura Lei de regulación do aproveitamento lúdico das augas termais impulsará a regularización e a seguridade dos usuarios dos espazos termais que hai en Galicia, daqueles que non teñen a categoría de balnearios pero que si prestan un servizo.

Ademais de seguir mellorando nos ámbitos nos que o turismo galego é unha referencia, o sector estase abrindo camiño tamén nalgúns dos nichos de mercado con máis potencial como o turismo industrial, coa metade das distincións Q a nivel español; ou o turismo activo con preto de 4 de cada 10 Q.

Cómpre salientar que Galicia mantén tamén a segunda posición en número de Q de calidade en dous tipos de establecementos fundamentais para o turismo: axencias de viaxes e servizos de restauración.

Nesta liña, Feijóo referiuse a Salvaterra de Miño como un referente da diversificación turísticas que se está a fomentar. Así, o xeodestino ría de Vigo-Baixo Miño recibiu en 2017 un 11% máis de turistas e un 20% máis de visitantes internacionais, contando cunha grande variedade de recursos turísticos.

Por último, o presidente da Xunta valorou que, segundo os primeiros datos do Clúster do Turismo, a nosa Comunidade tivese unha ocupación na Semana Santa de entre un 65% e un 80%, a pesar do mal tempo.

Feijóo concluíu destacando a oportunidade que suporá para o sector fitos tan importantes como son o Xacobeo de 2021 ou os recoñecementos como Patrimonio da Humanidade da Ribeira Sacra e de Cíes-Illas Atlánticas, que cada vez están máis preto.

- Publicidade -

ÚLTIMA REVISTA

+ VISTOS

SÍGUENOS

691FansGóstame
300SeguidoresSeguir

ETIQUETAS

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies