Centos de rosaleiros e rosaleiras participarán este domingo 10 na tradición secular de subir en procesión ao santo a ombros ata a capela
O Rosal quenta motores para retomar unha das súas tradicións con máis soleira do municipio, o San Martiño. Este domingo 10 de novembro, centos de veciños e veciñas subirán ao santo a ombros e en procesión ata a ermida, un ritual que se remonta ao século XVIII e que celebra a unión da veciñanza nun ambiente de música, tradición e profundo simbolismo.
Como sinala a alcaldesa, Ánxela Fernández Callís, “o San Martiño representa para todas e todos nós un vínculo co noso pasado e coas xeracións que nos precederon. Manter viva esta tradición, a pesar do paso dos séculos, é un orgullo para rosaleiros e rosaleiras”.
A programación comezará do San Martiño comezará co seu día grande: ás 10.30 horas o santo sairá en procesión dende a igrexa de Santa Mariña do Rosal, situada na Praza do Calvario, ata a ermida, onde ás 12.00 horas se oficiará unha misa solemne. Trátase dun percorrido con espectaculares tramos dos muíños do Folón e do Picón que estará animado por música, tradición e devoción a partes iguais. O luns 11 de novembro, o propio día de San Martiño, haberá misa ás 18.30 horas na igrexa de Santa Mariña e romaría animada polo grupo de gaitas Albariños do Rosal.
Unha das particularidades máis singulares desta romaría son os agasallos que a veciñanza leva ata o santo, un costume que se remonta a hai décadas e que incluso facía que durante unha época os cazadores o mesmo día da romaría ofreceran as súas capturas para poxa.
“O San Martiño é moito máis que unha romaría. É a nosa historia, a nosa xente e o noso orgullo”, conclúe a alcaldesa Ánxela Fernández, quen anima a toda a veciñanza a participar este domingo nesta festa única que conecta ao Rosal co seu pasado e mantén viva a súa cultura ano tras ano.
