O campionato forma parte da liga de J80 do Monte Real, que empezou o pasado mes de outubro co Trofeo de Outono
O Monte Real Club de Yates inaugura este sábado o seu calendario de regatas de 2015 coa celebración do Trofeo Vitaldent J80, unha competición organizada en exclusiva para esta clase de embarcacións.
O campionato, para o que permanece aberto o prazo de inscrición, incluirá 7 xornadas de probas na baía de Baiona. A primeira será este sábado, día 17, para continuar con 6 xornadas máis os días 31 de xaneiro, 14 e 28 de febreiro e 14 e 28 de marzo a partir do tres da tarde; e o domingo 29 de marzo desde as 11 da mañá. En cada un deses días os barcos disputaranse un máximo de tres mangas e a clasificación farase en tempo real.
Para dar a coñecer a clase J80 a máis navegantes, o comité permitirá a inclusión dun quinto tripulante, que navegará unicamente como observador. Deberá situarse detrás do patrón e non poderá participar nas manobras.
O Trofeo Vitaldent J80 forma parte da liga de J80 do Monte Real Club de Iates, que empezou o pasado mes de outubro co Trofeo de Outono. Nese primeiro campionato fíxose coa vitoria o Virazón, de Miguel Lago. En segunda e terceira posición quedaron o A miña Moeda, de Guillermo Caamaño, e o Namasté, de Luís de Mira.
Ademais deste trofeo, no calendario de regatas do club baionés hai programadas xa outras 10 competicións que se celebrarán ao longo de todo o 2015, un ano no que o Monte Real cumpre 50 anos de vida.
