Inicio Vigo e área Vigo O MARCO prorroga as exposicións de Manuel Vilariño e Celeste Garrido ata...

O MARCO prorroga as exposicións de Manuel Vilariño e Celeste Garrido ata o 4 de abril

Os espazos do primeiro andar do Museo de Arte Contemporáneo de Vigo, continúan abertos e o público poderá seguir visitando as mostras en calquera das súas modalidades: individualmente, participando nas visitas guiadas —actualmente limitadas a grupos de 5 persoas— ou mediante o novo sistema de rutas interactivas.

*MANUEL VILARIÑO. Seda de cabalo

Comisariado: Fernando Castro Flórez

Exposición producida pola Subdirección General de Museos Estatales do Ministerio de Cultura y Deporte

Seda de cabalo é a maior de cantas exposicións se realizaron ata esta data de Manuel Vilariño, fotógrafo e poeta, Premio Nacional de Fotografía 2007. Unha mostra comisariada por Fernando Castro Flórez, que revisa a súa traxectoria a través dunha selección de obras —fotografías, instalacións, vídeos, e tamén unha parte da súa produción poética— dende 1980 ata a actualidade. Máis que unha retrospectiva ao uso, está concibida como reflexo dos aspectos máis sobresaíntes da súa traxectoria e da súa estética, sempre marcada por un fondo poético e pola demanda dunha actitude contemplativa.

Atendendo a unha orde máis formal e conceptual que cronolóxica, a selección de obras e a súa disposición en salas responde á vontade de manter esa continuidade poética, temática e ambiental que dá sentido ao percorrido e a toda a obra de Manuel Vilariño no seu conxunto. Tamén, como parte integrante da exposición, unha das salas acolle unha selección de catálogos, publicacións e pezas gráficas relacionadas co artista, que se completa co dossier documental preparado na Biblioteca-Centro de documentación e accesible na web do MARCO.

*CELESTE GARRIDO. Os teus ollos din o que a túa boca cala

Produción: MARCO, Museo de Arte Contemporánea de Vigo

Comisariado: Miguel Fernández-Cid e Pilar Souto Soto

Coa colaboración da Deputación de Pontevedra

Celeste Garrido (Marín, Pontevedra, 1972) ten unha ampla traxectoria en proxectos teóricos e expositivos moi relacionados coa identidade e con cuestións de xénero. Esta mostra, específica para o MARCO, está deseñada a partir dunha coidada selección de obras en distintos formatos —na súa maioría de nova produción— que constrúen un relato en torno á temática do corpo como material, como soporte, como suxeito e como receptor, con especial alusión ao corpo feminino e ao vestido como símbolo.

Comprometida como artista e como muller, os seus proxectos desenvólvense dende unha óptica feminista e un posicionamento crítico, formulando propostas que apelan ao espectador e o fan cómplice dese compromiso. Neste contexto xorden, xunto á serie Nupcial, algunhas das obras que forman parte do seu novo proxecto, denominado Infancias rotas.

O MARCO prorroga as exposicións de Manuel Vilariño e Celeste Garrido ata o 4 de abrilVisitas guiadas pola artista

No caso da exposición de Celeste Garrido, existe a posibilidade de participar en visitas guiadas pola propia artista, limitadas a grupos de 4 participantes, mediante cita previa. As persoas interesadas poden consultar dispoñibilidade de datas e horarios na taquilla do MARCO:

Email recepcion.marco@gmail.com

Tel. 986 113900 / Ext. 100

- Publicidade -

ÚLTIMA REVISTA

Publicidade

+ VISTOS

Publicidade
Publicidade



Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies