O MARCO expón, ata o día 9 de marzo de 2025, a mostra “Unha imaxe de si”, articulada coas obras das artistas Marta María Pérez Bravo, Yolanda Herranz Pascual e Andrea Costas Lago, que forman parte dos fondos do museo.
“Unha imaxe de si”
Con frecuencia, as coleccións de arte son froito de arranques máis ligados ao entusiasmo que á planificación fría. As que nacen dende un apoio económico forte adoitan querer reflectir a historia recente ou a última actualidade; as que parten case dende o silencio, optan por ir tecendo unha especie de arañeira na que se fan posibles os diálogos, dende un claro compromiso cunha contemporaneidad plural. Obras e nomes fan que se creen relacións e vaia fluíndo, ata facerse visible, nítido, un relato que, con frecuencia, estaba na orixe.
A colección do MARCO, incipiente, sinala o seu campo de incidencia na súa primeira exposición con fondos propios, reunindo obra central de tres artistas: unha viguesa, outra bilbaína residente en Pontevedra e unha terceira cubana residente en México. A intención da proposta é clara: poñer en relación a mellor arte galega coa exterior, especialmente a peninsular e a americana, en sintonía coa nosa historia.
Das tres artistas seleccionadas móstrase unha ampla representación do seu traballo –case a xeito de pequenas exposicióes de cámara, con ese ambiente íntimo característico, no que cada proposta só se ve alterada pola presenza das outras. Elíxense temas afíns como son a identidade, o autorretrato, a presenza do corpo, a vindicación da condición feminina, as referencias á historia, á arte, a símbolos de culturas próximas por o vivido ou polo emocional.
Yolanda Herranz Pascual (Barakaldo, 1957) e Andrea Costas Lago (Vigo, 1978) recoñecen en Marta María Pérez Bravo (A Habana, 1959) un referente ético e estético, pero a ela lle sorprende a rotundidade e o toque persoal das propostas das súas compañeiras. E nese diálogo, nesa complicidade de obxectivos, é onde o espectador asiste a ese xogo de miradas, de ecos e sorpresas que está sempre presente na arte.
O director do museo, Miguel Fernández-Cid, explicou na presentación da mostra, que esta é o anticipo da estratexia deseñada polo goberno municipal para poñer en valor as coleccións do MARCO. “Comezamos con tres artistas cunhas claras vinculacións no seu traballo, mostralas de forma conxunta e provocar os diálogos que as obras suxiren”. A artista Yolanda Herranz Pascual destacou o “diálogo” que se establece entre as imaxes das tres creadoras ao redor de dous temas fundamentais: o corpo e a identidade.
Andrea Costas Lago expresó a súa satisfacción por “compartir a mostra con dous excelentes referentes”, á vez que incidiu en que “as artistas estamos nun momento en que as nosas voces empezan a ter forza e a escoitarse”.
