Inicio Galicia Compostela O Gaiás lembrará a etapa de Castelao no exilio cun concerto da...

O Gaiás lembrará a etapa de Castelao no exilio cun concerto da Filarmónica de galicia e un encontro con persoas refuxiadas

O Gaiás lembrará a etapa de Castelao no exilio cun concerto da Filarmónica de galicia e un encontro con persoas refuxiadas

Ambas actividades, que terán lugar o 17 de xaneiro, organízanse con motivo da exposición Castelao maxistral, mostra que permite contemplar por vez primeira en Galicia a icónica obra A derradeira leición do mestre

A Cidade da Cultura de Galicia continúa a despregar actividades ao redor de Castelao maxistral, a exposición que permite contemplar por vez primeira en Galicia a A derradeira leición do mestre, lendario cadro visitado xa por máis de 20.000 persoas. Este programa arrancará en 2019 cunha xornada dedicada ao exilio xa que foi nesta circunstancia cando o artista de Rianxo pintou o óleo que artella o relato da mostra. Deste xeito, o 17 de xaneiro, o Museo Centro Gaiás acollerá un concerto da Real Filharmonía de Galicia (RFG) —cun repertorio centrado nos países que percorreu o intelectual galeguista— e un encontro con persoas refuxiadas en Galicia, en colaboración con Aministía Internacional.

Este recital da RFG leva por título O camiño de Castelao e baséase nunha escolma de temas representativos dos diferentes países que marcaron a vida de Castelao, realizada ‘ex profeso’ polo director titular e artístico da formación, Paul Daniel. Deste xeito, e a través do repertorio escollido, os asistentes farán no Museo Gaiás un percorrido vital do periplo do artista galego desde Rusia, Cuba, os Estados Unidos de América e ata o exilio definitivo en Buenos Aires, a través de pezas de E. W. Korngold, Stravinsky ou Piazzolla, entre outros compositores.

Esta actuación especial —para a que xa están as entradas á venda en Ataquilla.com e no Museo Centro Gaiás— inxírese dentro do programa de actividades coas que se está a dinamizar a exposición Castelao maxistral. A boa obra ao mestre honra, que desde a súa inauguración, o pasado 5 de outubro, xa celebrou visitas-relatorio con especialistas na súa obra e figura —con todas as prazas cubertas— e un recital coa Coral Polifónica de Pontevedra, da que Castelao foi cantor, fundador (1925) e escenógrafo, traendo para a ocasión un pano ornamentando polo propio artista, que contadas ocasións sae do Museo de Pontevedra que o custodia.

Pór o foco no exilio para as actividades de xaneiro ten un vencello especial coa mostra, xa que A derradeira leición do mestre, homenaxe do artista de Rianxo ao seu amigo e intelectual asasinado, Alexandre Bóveda, foi pintado nestas circunstancias en Buenos Aires en 1945. Castelao asentouse na capital da Arxentina, tras un periplo por diferentes países que son os que determinan o programa do concerto escollido persoalmente polo propio Paul Daniel.

Así, en 1938, o intelectual galego realizou unha viaxe á extinguida URSS e, máis tarde, aos Estados Unidos de América e tamén a Cuba. Durante a súa presenza na illa caribeña, Castelao participou activamente nas eleccións do Centro Galego da Habana. A derrota republicana condenouno ao exilio, asentándose en Nova York, primeiro, onde publicou o álbum Milicianos e, posterior e definitivamente, en Buenos Aires (A Arxentina), onde chegou a estrear a súa peza teatral Os vellos non deben namorase.

Encontro con persoas refuxiadas

Precisamente, e tendo en conta o moito que marcou esta saída forzosa de Castelao de Galicia, antes do concerto e encadrado dentro destas actividades vencelladas á exposición, producirase un encontro con persoas refuxiadas na nosa comunidade, grazas á colaboración de Amnistía Internacional.

Este encontro pretende reflectir como na actualidade —fóra das nosas fronteiras pero en múltiples zonas a nivel global— moitas persoas vense obrigadas ao exilio —tal e como viviu Castelao— pola dureza da complicada situación xeopolítica dos seus países de orixe, vítimas de conflitos bélicos e políticos, especialmente visibles a través do número de persoas refuxiadas e/ou represaliadas.

Para darlle visibilidade a esta situación, a Cidade da Cultura incorpora este encontro nas súas actividades ao redor da exposición Castelao maxistral. A boa obra ao mestre co obxecto de sensibilizar a sociedade galega sobre as crúas experiencias nestes países, á vez que procurar eses paralelismos co contexto sociopolítico de Castelao, mais sobre todo trátase de escoitar e empatizar coas inquedanzas e necesidades destas persoas refuxiadas en Galicia.

O encontro será moderado polo responsable de Relacións Institucionais de Amnistía Internacional en Vigo, Manuel Martínez Barreiro, e formarán parte da mesa: Juan Sosa Madonado, refuxiado proveniente de Oaxaca (México) e Nour Al Hussen, refuxiada proveniente de Siria.

A asistencia ao encontro é de balde e nos vindeiros días activarase a inscrición na páxina web da Cidade da Cultura de Galicia —www.cidadedacultura.gal— xa que as prazas son limitadas.

- Publicidade -

ÚLTIMA REVISTA

+ VISTOS

SÍGUENOS

680FansGóstame
282SeguidoresSeguir

ETIQUETAS

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies