Inicio Latinoamérica Ecuador O Fondo Galego contribuíu á recuperación dun Concello ecuatoriano tras o terremoto

O Fondo Galego contribuíu á recuperación dun Concello ecuatoriano tras o terremoto

o-fondo-galego-contribuiu-a-recuperacion-dun-concello-ecuatoriano-tras-o-terremoto

A asociación de administracións locais e provinciais de Galicia achegou 8.000 euros para repoñer o sistema informático do municipio de Jama, o segundo máis afectado

O terremoto de 7,8 graos que deixou 673 persoas mortas en Ecuador é unha das principais catástrofes rexistradas no ano que remata. O  Fondo Galego de Cooperación e Solidariedade contribuíu a paliar as súas consecuencias cofinanciando a reposición dos sistemas informáticos do Concello de Jama, a segunda cidade máis afectada polo sismo, a pouco máis de 50 km do seu epicentro.

Faleceron 27 veciñas e veciños, dun total de 23.250, e o 85% dos edificios quedaron inutilizables. Entre eles, a propia Casa Consistorial, onde urxía ademais recuperar os sistemas informáticos. Estes resultan esenciais para o bo funcionamento dunha institución clave para minguar os efectos do desastre e impulsar á recuperación da zona e das súas xentes. O Fondo Galego achegou 8.000 euros para a súa adquisición, instalación e configuración e o Fons Català de Cooperació al Desenvolupament contribuíu con 2.000. A responsable de América Latina nesta entidade, Victòria Planas, visitará no primeiro trimestre de 2017 diversos concellos galegos para dar conta da actuación, que avaliou sobre o terreo.

O propio Concello de Jama puxo 16.382 euros para levala a cabo e tamén colaborou a Asociación Latinoamericana para a Integración dos Inmigrantes (ALII), que foi a encargada de mercar os equipos e asegurarse de que chegaran ao goberno local nas condicións axeitadas. Trátase dunha entidade catalá promovida por migrantes latinos, entre os que hai moitos do Ecuador, de xeito que a intervención inclúe así unha compoñente de codesenvolvemento.

O Fondo Galego

O Fondo Galego de Cooperación e Solidariedade está formado por 88 concellos e as deputacións da Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en 25 países e promove numerosas actividades e materiais en relación aos desequilibrios Norte-Sur.

- Publicidade -

ÚLTIMA REVISTA

+ VISTOS

SÍGUENOS

692FansGóstame
308SeguidoresSeguir

ETIQUETAS

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies