O Concello de Nigrán termina as obras de rehabilitación do faro de Canido, adxudicadas a Impervelper por importe de 218.649 € dos que a Unión Europea achega 132.730 € a través dos fondos Next Generation de axudas a entidades locais para a rehabilitación de edificios públicos de titularidade local (Pirep Local), no marco do Plan de Recuperación, Transformación e Resiliencia (PRTR).
O investimento, despois de décadas de abandono, permitiu unha reforma integral deste edificio sen afectar a súa superficie e volume co obxectivo de destinado a sede da Escola Municipal de Pintura e Gravado, así como dispoñer dun espazo para proxectos de integración a través da arte.
“Por fin o alumnado de Pintura e Gravado vai ter un local definitivo, céntrico e perfectamente habilitado, porque ao longo dos anos tiveron que ir rotando por diferentes espazos municipais”, explica o alcalde, Juan González, sobre estas dúas actividades do Concello ás que asisten preto de 80 persoas. Ao mesmo tempo, o lugar empregarase para poder desenvolver actividades artísticas destinadas a persoas con diversidade funcional.
O edificio, situado na linde entre Panxón e Nigrán, quedou durante décadas nun limbo urbanístico ata a modificación das normas subsidiarias no ano 2020. O obxectivo do goberno local foi eformar toda a planta baixa sen afectar á estrutura troncocónica do faro en si mesmo, que segue en activo cumprindo a súa función.
“Levaba anos en situación de abandono e ofrecendo unha imaxe degradada nunha contorna especialmente turística”, explica o alcalde, Juan González. “Cando a súa situación desbloqueouse no ano 2020 encargamos o proxecto e realmente foi moi complexa a tramitación porque requiriu de moitas autorizacións sectoriais que se demoraron máis do previsto ao incluír o edificio un faro en activo”, engade.
