O acto celebrouse o día no que se conmemoran os 55 anos da publicación de ‘Memorias dun neno labrego’ (Bos Aires, 1961), obra capital do autor de Gres e tamén a novela galega máis lida e traducida ata o día de hoxe
O conselleiro de Cultura, Educación e Ordenación Universitaria, Román Rodríguez, presidiu esta mañá o acto no que se lle concedeu o nome de ‘Xosé Neira Vilas’ ao Auditorio da Biblioteca e Arquivo de Galicia da Cidade da Cultura, decisión coa que se rende homenaxe ao escritor falecido en novembro de 2015, convertido nun símbolo das letras galegas. O acto celebrouse nunha data na que se cumpren os 55 anos da publicación de ‘Memorias dun neno labrego’ (Bos Aires, 1961), a obra capital de Neira Vilas e a novela galega más lida e traducida ata o momento.
A homenaxe contou coa presenza do presidente da Real Academia Galega, o da Fundación Xosé Neira Vilas, o secretario xeral de Política Lingüística e a directora-xerente da Fundación Cidade da Cultura, entre outros
O acto, que se iniciou coa lectura dos primeiros parágrafos de ‘Memorias dun neno labrego’ por parte dun alumno do Colexio Rural Agrupado de Boqueixón-Vedra, contou tamén coa presenza do presidente da Real Academia Galega, Xesús Alonso Montero; o presidente da Fundación Neira Vilas, Luis Reimóndez; o secretario xeral de Política Lingüística, Valentín García, o secretario xeral técnico, Jesús Oitavén, e a directora-xerente da Fundación Cidade da Cultura de Galicia, Beatriz González Loroño.
“Este auditorio levará con orgullo un nome imprescindible para as letras galegas, o nome dun talento creativo universal, que ten inspirado a moitas xeracións e que, sen dubida, será referencia para moitos máis galegos no futuro”, asegurou o conselleiro. Do mesmo xeito, destacou que a lembranza a Neira Vilas se situará no corazón dunha Biblioteca onde se preserva a “memoria bibliográfica” de Galicia, conservando copias de todo canto libro se edita en galego, escrito por galegos ou con Galicia como protagonista.
Ao acto de homenaxe tamén asistiron o presidente do Consello da Cultura Galega, Ramón Villares; o secretario xeral de Emigración, Antonio Rodríguez Miranda; os alcaldes de Santiago, Boqueixón e Vila de Cruces –Martiño Noriega, Ovidio Rodeiro e Jesús Otero, respectivamente–, o presidente da Real Academia Galega de Bellas Artes, Manuel Quintana Martelo, entre outras autoridades e representantes do mundo da cultura, así como familiares do escritor de Gres. Ademais, o músico Roi Casal interpretou acompañado pola súa arpa acústica dous poemas de Neira Vilas musicados.
