O Monte Real Club de Yates inaugura esta fin de semana nas Rías Baixas o seu calendario deportivo deste 2025 coa liga de Inverno Baitra J80, unha competición crave para os monotipos de 8 metros e unha cita xa consolidada no panorama da vela galega.
O campionato, que mantén un ano máis o patrocinio de Baitra Accesorios Navais, contará cunha frota máis nutrida e promete ser un dos máis disputados, coa participación duns 25 barcos que se enfrontarán en cinco xornadas desde este sábado ata o 5 de abril. Trátase da frota de monotipos máis grande de España na actualidade, todo un orgullo para un club que leva anos apostando por esta modalidade.
Entre as novidades desta edición destaca a incorporación de novas embarcacións á frota. Entran en escena o Bombardeira, patroneado por Lucas Lorenzo; e o Gaifar IV, con Yago Osuna á fronte. Ademais, o Arriscado, un vello coñecido da competición, volve á auga cunha nova tripulación, armada e liderada por Miguel Montes e Lorena Fritise.
O Grupo Bazán, de Joaquín Martínez, chegará desde Ferrol para sumarse a unha liga que xa conta cunha destacada representación de equipos de distintos puntos de Galicia e Portugal.
Desde o país veciño súmase como novidade o Ambar, de Bruno Alburquerque; e volve, tras un período de descanso, un vello coñecido entre os J80 galegos, o Marías de Manel Cunha. Portugués tamén se escoitará falar a bordo do Mondo de Bernardo Macedo e as 4 Xotas de Joaquim Moreira.
O Alboroto de Juan Carlos Ameneiro preséntase como claro aspirante a revalidar o título logrado na edición anterior; na que o Solventis de Malalo Bermúdez e o Picacho de Miguel Vello quedaron segundo e terceiro respectivamente.
O Cansino de Alejandra Suárez, o Due de Rafael Blanco, o Waikiki de Andrés Gómez, o Luna Nueva de Juan Luis Tuero, o Namasté de Luis de Mira ou o Abril de Chisco Catalán son outros dos barcos que participarán nesta nova Liga de Inverno, unha das nove probas programadas polo Monte Real para este 2025, ano no que o club celebra o seu 60 aniversario.
Sucederanlle no calendario o Trofeo Verde (26 abril), o Trofeo Repsol (1-4 maio), a Galicia Sailing Week – TP52 SUPER SERIES (2-7 xuño), o Campionato Gallego de dous en dous (14 xuño), o 50º Trofeo Conde de Gondomar (24-27 xullo), o 40º Trofeo Príncipe de Asturias (5-7 setembro), a liga de Outono Gestilar J80 (outubro-decembro) e a II Liga Cíes Rande (26 abril e 13 setembro).
