Este día serán entregados os premios do III Certame de Relato Curto para escolares de Nigrán, convocado en febreiro pasado
O Concello de Nigrán e a Fundación Carlos Casares colaboraron un ano máis para homenaxear, potenciar e dar a coñecer a figura e a obra de Carlos Casares entre a mocidade de Nigrán a través dun concurso literario e, por esta razón, celebran este sábado 12 de abril III Gala Carlos Casares: no camiño das artes, durante a cal serán entregados os premios aos gañadores e gañadoras. O III Certame de Relato Curto para escolares de Nigrán realizouse este ano baixo o lema ‘Un lobo e un can, andan soltos por Nigrán’, en referencia á famosa obra do escritor e veciño de Nigrán ‘O can Rin e o lobo Crispín’. A finalidade é estender o legado do escritor ás novas xeracións nun concello que namorou tanto a el como a Kristina Berg, a súa muller, e onde construíron o seu fogar definitivo.
A Gala terá lugar este sábado 12 de abril no Auditorio Municipal dende as 18:00 horas e será presentada por Marina Sánchez-Canal Cultura. Nela haberá actuacións da Banda Xuvenil da Escola da Agrupación Vincios dirixida por María García Bustos, ‘Polo Correo do Vento’ e ‘Orquestra de Camarote’.
