Máis de cincuenta usuarios participaron no concurso de Entroido de centros de día do Val Miñor, celebrado esta mañá no auditorio municipal de Nigrán. A cita congregou a persoas do centro residencial Vila do Conde, da residencia Bo día, dos centros de día Botando unha Man e do mancomunado do Val Miñor, que protagonizaron actuacións inspiradas en distintas temáticas.
O xurado, composto por edís municipais de Nigrán e Baiona, entregou o primeiro premio a “Hai un galego na lúa”, de Vila do Conde e o segundo a “A boda xitana”, do centro de día mancomunado do Val Miñor. Houbo ademais dúas mencións especiais, unha a “Imos de Romería”, de Botando unha Man, pola súa escenografía, e outra aos “Cociñeiros” da residencia Bo día pola súa simpatía. A xornada tamén contou coa presenza da Asociación Cultural de Baíña e do Trío Azar, que amenizaron o acto.
