A noite do martes promete ser un dos puntos álxidos da semana coa proxección de curtametraxes galegas, que levarán ao escenario as voces de cineastas emerxentes do país
A XIX Semana de Cine de Cangas continúa a súa programación cunha acollida extraordinaria por parte do público. Dende a inauguración o pasado venres, na que se proxectou As Neves, e ao longo de todo o fin de semana, máis de 500 persoas (529 en total) pasaron polo Auditorio Municipal de Cangas para gozar das proxeccións.
O sábado destacou O mal non existe, o drama xaponés de Ryūsuke Hamaguchi, que capturou a atención do público cun relato profundo sobre a convivencia entre o progreso e a natureza
‘Galicia en curta’, talento emerxente
A noite do martes promete ser un dos puntos álxidos da semana coa proxección de curtametraxes galegas, que levarán ao escenario as voces de cineastas emerxentes do país. Esta sección contará con obras que exploran dende o realismo máxico ata historias persoais e íntimas que conectan coas raíces e realidades de Galicia. Unha oportunidade perfecta para descubrir o cinema que vén.
Recta final da Semana de Cine
Durante os próximos días, a programación continuará cunha selección de filmes para todos os gustos. O mércores estará dedicado ás escolas con Dounia e o eco do tambor, mentres que o xoves será a quenda de Luzzu, un filme maltés que explora os desafíos dun pescador nun ecosistema en perigo.
A Semana de Cine pechará o venres co documental galego Chichi e máis eu, que contará coa presenza do director Nico Campos, quen participará nun coloquio co público.
O Cineclub Cangas, organizador do evento, quere agradecer o apoio e o entusiasmo mostrado polo público ata o momento, e invita a toda a veciñanza a seguir participando nesta festa do cine.
