Lucenza – Ateneo de Nigrán organiza este venres 13 de decembro ás 20 horas na Biblioteca de Nigrán a proxección da película “Retorno a Tagen Ata”, curtametraxe do cineasta xa falecido Eloy Lozano, ao que se homenaxea neste acto que conmemora os 50 anos da realización desta película pioneira do cinema galego.
“Retorno a Tagen Ata” e unha curtametraxe baseada na novela homónima que Xosé Luis Méndez Ferrín publicou en 1971.
Para falar tanto da novela como da película “Retorno a Tagen Ata” e axudar a contextualizar ditas obras que viron a luz nos últimos anos do franquismo, intervirán no acto o profesor de lingua e literatura galega Iago Castro Buerger, bo coñecedor da obra de Ferrín, e a mestra Delfina Meire Dorado, que foi a protagonista principal do filme e que falará da figura de Eloy Lozano e sobre as tarefas de rodaxe e difusión desta curtametraxe naqueles anos. Presentará o acto o presidente de Lucenza Xabier Méndez.
Ao remate da proxección, seguiralle un coloquio co público.
