Inicio Galicia Galicia celebra o Día Internacional dos Museos cunha completa programación nos centros...

Galicia celebra o Día Internacional dos Museos cunha completa programación nos centros autonómicos das catro provincias

Galicia-celebra-Día-Internacional-Museos-cunha-completa-programación-centros-autonómicos-catro-provinciasOs museos xestionados pola Consellería de Cultura, Educación e Ordenación Universitaria da Xunta de Galicia propoñen unha completa e diversa programación de actividades para convidar a todos os galegos e as galegas a celebrar o Día Internacional dos Museos, o vindeiro luns 18 de maio, que este ano se presenta baixo o lema ‘Museos para unha sociedade sustentable’.

No marco desta celebración, o Museo Centro Gaiás, o Museo de Belas Artes da Coruña, o Museo Massó de Bueu, o Museo das Peregrinacións e de Santiago, o Museo Arqueolóxico Provincial de Ourense (MAPOu), o Museo do Mar de Galicia, o Museo do Castro de Viladonga, o Museo Etnolóxico de Ribadavia, o Centro Galego de Arte Contemporánea (CGAC) e mais o Museo Pedagóxico de Galicia (Mupega) organizan múltiples propostas co fin de lle achegar á cidadanía o patrimonio cultural dun xeito divulgativo e lúdico.

Xornadas de portas abertas, visitas teatralizadas, actuacións de música tradicional, espectáculos escénicos, concertos a cargo de diversas agrupacións, horarios especiais, conferencias, presentacións de libros, exposicións e roteiros son as principais propostas para o Día dos Museos, unha celebración que se prolongará ata finais deste mes. Toda a programación conmemorativa do Día dos Museos pódese consultar na Axenda de Cultura, a través da páxina web cultura.gal.

A música e Picasso, protagonistas en Belas Artes
Para celebrar esta data, o Museo de Belas Artes da Coruña propón unha fin de semana de concertos, visitas guiadas e horario especial arredor da exposición ‘O primeiro Picasso’. Esta programación especial, que se desenvolverá desde mañá venres e ata o domingo, comezará o día 15 de maio cun concerto de Xoel López que terá lugar ás 20,30 horas. O artista, que regresa á súa cidade natal, avanzará algúns dos temas do seu próximo traballo, ‘Paramales’. As entradas sortearanse no facebook do museo e en emisoras de radio locais.

Con motivo da Noite dos Museos, o sábado 16 de maio, Belas Artes abrirá as súas portas ata as 24 horas, ademais de ofrecer visitas guiadas gratuítas con carácter extraordinario á súa exposición sobre Picasso, para grupos de 25 persoas nos seguintes horarios: 19,30, 20,30 e 21,30 horas. As persoas interesadas deberán anotarse a partir do 11 de maio no teléfono 881 881 700. A xornada do sábado na Coruña tamén incluirá un concerto de jazz a cargo de Roberto Somoza Trío. Acompañado de Naíma Acuña e Álex Salgueiro, o artista interpretará temas de ‘Cal e Area’, un disco no que lle rende homenaxe ao mítico músico de Betanzos Antonio Cal.

Para pechar a semana, o museo coruñés programa unha nova visita guiada, ás 12,30 horas, á exposición ‘O primeiro Picasso’, con inscrición previa, xunto co taller ‘Picasso en familia’, unha divertida proposta para achegarse ao neno Pablo Picasso e á Coruña á que chega a finais do século XIX a través do xogo e o diálogo coas da mostra obras, dirixida a nenos e nenas de entre 5 e 12 anos, acompañados por un adulto. A inscrición para participar pode realizarse a partir do 11 de maio.

Filgueira Valverde no Museo Centro Gaiás
Na capital de Galicia, o Museo Centro Gaiás celebra o Día dos Museos por partida tripla. Do 16 ao 18 de maio, ofrece xornadas de portas abertas, visitas guiadas especiais, obradoiros, xogos, conferencias, concertos e todo un programa de actividades baixo o patrocinio de Vodafone que farán que entrar no museo sexa unha experiencia máis que divertida.

O sábado 16, o domingo 17 e o luns 18 de maio, xornada na que se celebra en todo o mundo o Día dos Museos, a entrada á exposición ‘Camiño. A orixe’ será de balde. E como a celebración desta data coincide co Día das Letras Galegas, ás xornadas de portas abertas e ás visitas guiadas á exposición súmanse as Visitas Filgueira Valverde, un percorrido no que descubrir a figura deste intelectual galeguista a través de varias pezas da mostra e xogos para gozar en familia. Ademais, a Cidade da Cultura convida o día 16 a pequenos e maiores a facer seu o Museo Centro Gaiás, con actividades para todas as idades.

‘Geocaching’ no CGAC
Santiago tamén contará coas propostas do Centro Galego de Arte Contemporánea, que se suma a esta celebración cunha xornada de portas abertas o propio día 18. Ademais, toda esa semana terá lugar o ‘geocaching’, unha actividade na que os xogadores buscan ou agochan tesouros (cachés) ocultos. Deste xeito, para atopar os cachés ocultos, o público mergullarase nos diferentes espazos do CGAC e percorrer as exposicións seguindo as pistas que se marcan nunha aplicación móbil gratuíta para tal fin. Tamén durante toda a próxima semana, e seguindo o lema de “Museos para unha sociedade sustentable”, o Centro Galego de Arte Contemporánea quere representar a relación entre biodiversidade e a diversidade sociocultural mediante a entrega aos visitantes de plantóns procedentes de sementes ecolóxicas co obxecto de que cada persoa se encargue de froitificalas. Un taller de fotografía, charlas, conferencias e concertos completan a actividade do CGAC con motivo do Día Internacional dos Museos.

A programación de Cultura e Educación na cidade compostelá completarase coas actividades do Museos das Peregrinacións e de Santiago e mais do Mupega. Do 19 ao 22 de maio, o primeiro desenvolverá visitas teatralizadas ao museo para alumnado de secundaria, nas que a compañía TEP Teatro en Punto fará revivir “as Marías”, dúas figuras imprescindibles das rúas compostelás, para achegar os estudantes á historia da capital de Galicia. Ademais, este mes de maio o Museo da Peregrinacións e de Santiago estrea un novo formato de visitas dinamizadas aos fondos da súa colección, para lle descubrir ao alumnado de primaria e secundaria a historia e a arte dun xeito singular. Finalmente, tamén haberá xornadas de portas abertas no museo de 10 a 15 horas, con visitas guiadas de 30 minutos de duración que non precisan inscrición previa.

Ao abeiro do lema deste ano, ‘Museos para unha sociedade sustentable’, o Mupega sumarase a esta conmemoración con diversas propostas entre os días 18 e 23 de maio, que inclúen visitas guiadas pola historia da educación ambiental e mais da sustentabilidade na aulas e nas escolas a través da súa colección, xunto coa exposición temporal ‘A escola tamén é sustentable’, que se poderá visitar do 13 ao 16 de maio.

Propostas arqueolóxicas no Museo Massó
O Museo Massó de Bueu, en Pontevedra, presentará o día 15 de maio a publicación ‘O mundo antigo no Museo Massó e a romanización en Bueu’, mañá venres, ás 20:30 horas. Da autoría de Fructuoso Díaz e editada pola Consellería de Cultura e Educación, a obra dá a coñecer as conclusións da escavación arqueolóxica realizada no depósito romano de Pescadoira, na que foron atopados os restos dunha factoría de salgadura, un obradoiro de ánforas e unha vila.

Ademais, o Museo Massó tamén organizará o venres 29 de maio, ás 20:30 horas, unha charla sobre a ánfora romana de San Martiño de Bueu, unha das pezas singulares do museo, impartida polo arqueólogo Adolfo Fernández e a restauradora Marta Lago.

En Vigo, o Museo do Mar de Galicia, celebrará unha xornada de portas abertas completamente de balde durante toda a xornada do domingo, día das Letras Galegas, nun horario de 10 a 14 e de 17 a 19 horas. Ademais de visitar as exposicións permanentes do Museo, quen acudan poderán contemplar o impresionante esqueleto dun cachalote e un submarino orixinal, así como o acuario onde se mergullarán nun anaco dunha ría galega para ver algunhas das especias que nela habitan. Precisamente durante toda esta fin de semana e ata o domingo día 24, os interesados poderán seguir desfrutando da exposición itinerante “Tierra, mar, aire” da Fundación Aena, que leva rexistrada unha grande afluencia de público ata o momento.

Obradoiros de fotografía, en Ribadavia
Na provincia de Ourense, o Museo Etnolóxico de Ribadavia programará do 18 ao 31 de maio obradoiros de fotografía para escolares dos concellos ourensáns, para dar a coñecer os seus fondos, que inclúen unha visita á área documental do museo e mais ao taller de restauración. Pola súa parte, o Museo Arqueolóxico Provincial de Ourense organizará xornadas de portas abertas do 19 ao 22 de maio, con visitas guiadas para grupos, ás 12 horas, ao Pazo do Bispo, previa inscrición.

A programación do MAPOu completarase cunha actuación de Fernando Abreu (clarinete) e Pablo Carrera (guitarra), que o 18 de maio presentarán o seu traballo ‘Dous’; coa presentación da exposición ‘Propostas arquitectónicas para a rehabilitación do MAPOu’, o día 19 ás 12 horas no Pazo do Bispo; cunha visita guiada ao parque de San Lázaro ás 12 horas e a presentación da ‘Peza do mes de maio’ –unha fotografía dos anos cincuenta do dito parque–, a cargo de Vicente Rodríguez García na sala de San Francisco, o día 20; coa presentación, o día 21 de maio, da exposición ‘Castros lucenses’, no Centro da Cultura Castrexa de San Cibrao de Las; e, finalmente, o venres 22 terá lugar a actividade ‘Conversas no museo’, co Colexio de Arquitectos de Ourense, no Pazo do Bispo.

Obradoiros para coñecer a cultura castrexa
O Museo do Castro de Viladonga, no concello lucense de Castro de Rei, tamén se suma á celebración con diversas propostas para o 16 de maio. Ás 17,30 horas, a Asociación Cultural Os Valouros, de Castro de Rei, ofrecerá unha actuación de música tradicional no xardín do museo, mentres que no castro se realizarán diversas actividades e obradoiros arredor da época castrexa, con reconstrucións de pezas de cerámica, realización de tecidos e simulación de sons castrexos. A continuación, ás 20 horas, o museo ofrecerá un concerto a cargo do grupo galego de blúes Miki Nervio & The Bluesmarkers. Para rematar a xornada, ás 22,30 horas haberá unha visita nocturna ao castro. Finalmente, o propio 18 de maio, ás 11,30 horas, o museo acollerá o espectáculo A-TA-KA, do grupo Cal y Canto, que inclúe coreografías con comentas de animais fantásticos.

- Publicidade -

ÚLTIMA REVISTA

+ VISTOS

SÍGUENOS

692FansGóstame
308SeguidoresSeguir

ETIQUETAS

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies