O alcalde de Nigrán, Alberto Valverde, e a concelleira de Patrimonio, Xuventude e Igualdade, María José Pino, inauguraron hoxe o curso de iniciación á fotografía do programa Actívate da Deputación de Pontevedra. O curso, no que participan 25 mozos de entre 16 e 35 anos, desenvolverase nas instalacións do Centro Antena até o próximo mes de novembro.
Os participantes desta iniciativa terán 40 horas de formación para adquirir os coñecementos básicos sobre o uso dunha cámara e os seus accesorios, así como para coñecer e aplicar diferentes técnicas fotográficas e as condicións lumínicas, e o seu aproveitamento.
