O domingo 7 de xullo a Carballeira do Peirao de Arcade acollerá a 1ª edición do Rebulir, o 1º Festival de Danza Contemporánea no que as persoas interesadas poderán desfrutar e tamén participar en distintos obradoiros, con compañías tan importantes como Elahood , Ixa ou Daniel Rodríguez
A danza contemporánea xorde como unha reacción ás formas clásicas e probablemente como unha necesidade de expresarse máis libremente co corpo. É unha clase de danza na que se busca expresar unha idea, un sentimento, unha emoción, pero mesturando movementos corporais propios do século XX e XXI. Este festival de danza contemporánea , O Rebulir, nace como unha nova proposta de dinamización cultural e social achegando esta disciplinas a Soutomaior para crear novos públicos e novas inquedanzas artísticas.
A concelleira de Cultura, Silvia Cernadas, presentou este Festival e deixou claro que “queremos que a danza tamén forme parte da completa programación cultural do concello de Soutomaior. Nese sentido, O Rebulir nace como un festival de danza contemporánea que mestura cultura e natureza e que vai ser referencia na contorna porque non hai nada igual. Tres destacadas compañías do panorama nacional interactuarán co espazo natural da Carballeira do Peirao de Arcade e todos os públicos poderán desfrutar desta cita ben sexa participando dos obradoiros, ben sexa asistindo ás representacións ou ao coloquio final”.
Dende o concello de Soutomaior queren propiciar novas inquezandas culturais que dinamicen o tecido cultural e social e tamén os espazos como lugares onde expresarnos con liberdade e respeto.
A proposta inclúe tres pezas de danza de compañías moi relevantes no panorama da danza e tamén obradoiros de danza para diferentes pùblicos onde todos e todas poden experimentar e aprender sobre danza da man de grandes bailarinas e bailaríns.
Así e deste xeito o domingo 7 de xullo pola mañá, ás 11:00 h., poderemos desfrutar do obradoiro de danza contemporánea coa compañía Elahood destinado a público xuvenil e adulto e ás 12:00 a cita estará protagonizada pola compañía de Daniel Rodríguez e o obradoiro estará destinado para o público infantil e familiar.
Xa pola tarde chegará a quenda dos espectáculos: ás 20:00 poderemos desfrutar de “Intempestiva” de Elahood; ás 20:45 h. de “Ollos cara adentro” da compañía Ixa; ás 21:00 h. de “A raíz” de Daniel Rodríguez e ás 21:30 todas e todos os que o desexen poderán participar nun coloquio coas compañías participantes. Todas estes espectáculos están destinados ao público xeral.
É importante destacar que todos os obradoiros e os espectáculos serán de balde e se desenvolverán na Carballeira do Peirao de Arcade. Sinalar tamén que para os obradoiros non se precisa inscrición previa, simplemente se pode participar no que se desexe unha vez chegado ao punto de desenvolvemento do mesmo.
Dende o concello convidan a todo o mundo a participar e a formar deste 1º Festival de danza contemporánea de Soutomaior, O Rebulir.
