Faro Silleiro conta con máis dun século de historia dando servizo nunha costa perigosa, moi batida polos ventos, e de acceso fundamental ás rías de Vigo e Baiona
É o primeiro faro da provincia de Pontevedra reconvertido en hotel e o 3º da Comunidade galega, sumándose, deste xeito, ao de Punta Insua (en Lariño, Carnota) e ao de Illa Pancha (en Ribadeo, Lugo). A nivel nacional, segue o exemplo do faro de San Sebastián, na Costa Brava, e do de Punta Cumplida, na illa da Palma.
Cabo Silleiro abriu oficialmente hoxe as súas portas tras un proceso de reconversión que se remonta a 2021, momento no que arrincou o concurso público para darlle un uso hostaleiro, aínda que non foi ata xaneiro de 2024 cando obtivo a licenza, despois de que o Estado dese luz verde en novembro de 2023 á explotación das instalacións dos dous faros situados na vila de Baiona con destino a actividade hostaleira e de restauración.
Segundo destacou o máximo responsable portuario, Carlos Botana, na inauguración deste novo espazo, na que tamén participaron o presidente da Xunta de Galicia, Alfonso Rueda; o alcalde de Baiona, Jesús Vázquez Almuiña; o director de Explotación de Portos do Estado, Pedro García; e os socios responsables da empresa concesionaria “Lighthouse Baiona”, entre outras autoridades, Faro Silleiro conta con máis dun século de historia dando servizo nunha costa perigosa, moi batida polos ventos, e de acceso fundamental ás rías de Vigo e Baiona.
Neste contexto, puxo en valor a dedicación e enxeño dos torreros (como se coñecía antigamente aos fareros), que xogaron un papel fundamental no mantemento deste faro, sobre todo en tempos da postguerra española e a guerra en Europa, que provocaron unha falta de abastecemento de materiais e subministracións que puxeron en perigo o seu funcionamento, á vez que se referiu a “os miles de barcos que foron guiados pola luz do faro de Cabo Silleiro”.
Aposta polo patrimonio marítimo
Durante a súa intervención, tamén fixo fincapé na posta en valor do patrimonio histórico e cultural como un dos obxectivos que persegue a estratexia europea de economía azul sostible que lidera a APV desde o ano 2016 e, neste sentido, valorou moi positivamente a aposta de Lighthouse Baiona pola excelencia, o coidado do medio ambiente e a sustentabilidade, e a xeración de valor para a contorna.
