O conselleiro de Economía e Industria, Francisco Conde, mantivo hoxe un encontro con empresas e asociacións da cadea de valor da xeotermia en Galicia, co obxectivo de avanzar nas medidas para impulsar o uso desta enerxía limpa e renovable nos fogares galegos e contribuír deste xeito á creación de riqueza e emprego neste sector con interese crecente en Galicia, e que factura xa 15 millóns de euros ao ano.
O encontro forma parte do diálogo para consensuar cos diferentes axentes implicados o novo plan no que a Xunta está a traballar para promover a climatización mediante enerxía xeotérmica. No mesmo participaron representantes da Asociación Clúster da Xeotermia de Galicia (Acluxega) e do centro tecnolóxico EnergyLab, así como do Colexio de Enxeñeiros Industriais de Galicia e da Asociación Técnica Española de Climatización e Refrixeración, ademais de diferentes empresas que forman parte deste ámbito de actividade.
Tal e como se subliñou na reunión, co desenvolvemento do plan da xeotermia, co que se fomentará o aforro e a eficiencia enerxética, búscase situar a Galicia como referente en xeotermia e xerar valor e emprego en todo o ciclo produtivo asociado ao aproveitamento desta enerxía, activando unha industria que involucra desde empresas de sondaxe e instaladoras, a arquitectos e aparelladores, enxeñarías e fabricantes.
Nos últimos tres anos téñense realizado arredor de 800 instalacións de climatización mediante xeotermia en Galicia, alcanzando deste xeito o 35% das instalacións rexistradas en España hoxe en día. De cara a impulsar aínda máis a demanda deste tipo de sistemas, o Goberno galego activará proximamente unha liña de axudas específica para a implantación de equipos de xeotermia. Os beneficiarios desta convocatoria, como sucede coas de caldeiras de biomasa, poderán solicitar a dedución do 5% na súa declaración da renda, establecida polo Goberno galego para fomentar a instalación de equipos que empreguen fontes renovables.
Así mesmo, lembrouse na reunión, na que o conselleiro escoitou as achegas dos axentes implicados, que se está a traballar na simplificación da autorización administrativa para a instalación destes equipos, que pasará de rexerse pola lei mineira a facelo polo regulamento de instalacións térmicas. Tamén se incide na formación de especialistas e na divulgación.
Do mesmo xeito, con esta iniciativa enmarcada na aposta da Xunta polas fontes renovables autóctonas como un dos piares fundamentais da súa política enerxética, reducirase a dependencia enerxética dos derivados do petróleo, e contribuirase á protección do medio natural coa conseguinte redución de emisións de CO2.
