Alfredo López e Soledad García forxaron un escenario de compromiso ambiental na praia de Panxón con máis de 200 nenas e nenos.
O Día Mundial das Baleas e Golfiños, organizado polo Concello de Nigrán en colaboración coa Coordinadora para o Estudo dos Mamíferos Mariños (CEMMA) e a escritora Soledad García destacou pola capacidade de sensibilizar sobre a importancia da conservación mariña e a diversidade.
O evento comezou ás 11 da mañá cun contacontos presentado pola escritora, que cautivou aos máis pequenos cunha historia real dun animal mariño, subliñando a necesidade de reducir o lixo nas praias e protexer a diversidade mariña. A través do seu relato, Soledad García logrou transmitir aos asistentes, tanto nenos como adultos, a urxencia de adoptar prácticas sostibles para garantir a saúde dos nosos océanos mentres aprendían os animais en lingua de signos.
Ás 11:30, o biólogo Alfredo López da CEMMA realizaba un simulacro de rescate de golfiños mariños varados. A actividade, seguida con gran interese polo público, proporcionou leccións prácticas sobre a importancia da rápida intervención e do coidado e características destes animais, destacando o impacto devastador que os residuos plásticos teñen nos océanos.
O evento foi un claro exemplo de accesibilidade e inclusión. A CEMMA e Soledad García lograron non só educar e entreter, senón tamén inspirar unha nova xeración de defensores do medio ambiente, demostrando o compromiso da comunidade coa conservación das nosas praias, dunas e ecosistemas mariños.
