A aplicación levouse a cabo dentro do proxecto denominado Oficinas Virtuais de Turismo (OVT), un dos proxectos que se puxeron en marcha nos municipios que pertencen á Asociación Vilas Mariñeiras, formada por poboacións de Galicia, Asturias e Cantabria con características parecidas ao noso municipio.
Desde o 30 de xullo 2015 a aplicación turística de Baiona está tamén dispoñible na versión en inglés
A app, dispoñible para dispositivos Android e IOS, está destinada a facilitar á visitante información sobre os recursos e servizos turísticos mediante as novas tecnoloxías de geolocalización.
Os recursos turísticos dispoñen ademais dunha locución da información, co cal a persoa que está a utilizar a aplicación pode usala tamén coma se fose unha audioguía.
Ademais está dispoñible a información de diversos servizos de 
aloxamento, restauración, comercio, lecer, teléfonos de interese, eventos, etc.
A posta en marcha deste sistema supón, segundo sinala a responsable do departamento de Turismo, María Iglesias, contar cunha nova ferramenta tecnolóxica de gran utilidade para o sector turístico que complementa o servizo de información presencial que se ofrece ao turista que visita a Vila durante todo o ano.
Este ano levouse a cabo outra fase de implantación da aplicación que supuxo a inclusión dun apartado de noticias e a creación dun xestor de contidos para cada municipio, que posibilita a actualización e inclusión de nova información nun breve espazo de tempo.
Para iso, as empresas que así o desexen poden remitir a súa información ao Departamento de Turismo a través do seguinte correo electrónico: cat@baiona.org
