O conxunto rosaleiro acadou a máxima puntuación do certame cunha obra de máxima dificultade a nivel solista e banda
A Agrupación Musical do Rosal vén de asinar unha páxina inesquecible na historia musical de Galicia. Con 641 puntos, o conxunto rosaleiro acadou a máxima puntuación no Certame Galego de Bandas de Música organizado pola Federación Galega de Bandas de Música e proclamouse gañador da sección primeira interpretando como obra libre ‘Wine-Dark Sea’, de John Mackey, unha obra de máxima dificultade tanto para solista como para banda.
A rotunda vitoria no Certame Galego de Bandas de Música confirma ao Rosal como un referente cultural e musical en Galicia
É a primeira vez que unha agrupación se atreve a levar unha composición deste calibre a un certame, marcando un fito sen precedentes. Ademais, como peza de presentación, a Agrupación Musical do Rosal interpretou ‘Gallaecia’, de José Bugallo Senra, e a obra ‘Imaxes Olívicas’ a proposta pola organización, seleccionada entre as obras premiadas en anteriores edicións do concurso.
Esta vitoria non só coroa un traballo de preparación exhaustivo, senón que tamén subliña o crecemento musical que está a vivir nestes momentos O Rosal, en gran parte grazas ao esforzo incansable de Agrupación e de todas e todos os seus integrantes.
