Ofrecerá un emotivo concerto o sábado 24 de xuño ás 20.00 horas na Praza Pintor Antonio Fernández
Vinte e cinco anos de vida e música a esgalla. A Agrupación Musical de Goián celebra a vindeira semana o seu 25 aniversario cun emotivo concerto aberto a toda a veciñanza no que o público poderá gozar non só dunha xornada chea de música, senón tamén da propia historia da Agrupación.
O concerto será o vindeiro sábado 24 de xuño ás 20.00 horas na Praza Pintor Antonio Fernández de Goián, no que ademais de participar as e os actuais integrantes da agrupación acudirán antigos directores e músicos que pasaron pola banda ao longo deste cuarto de século de historia.
Baixo a batuta de Pedro Villarroel, a Agrupación Musical de Goián aproveitará este gran concerto para estrear o pasodobre ‘Raíces’, creado para o aniversario por Andrés Álvarez, compositor, trompetista e membro fundador.
